കോട്ടയം: സ്‌കൂള്‍ ഓഫ് മെഡിക്കല്‍ എജ്യുക്കേഷനിലെ (എസ്എംഇ) വിദ്യാര്‍ഥിനിയെ ക്ലാസ് മുറിയില്‍വച്ച് പെട്രോള്‍ ഒഴിച്ച് കൊല്ലാന്‍ ശ്രമം. പ്രണയ ബന്ധം നിരസിച്ചതാണ് കാരണം. പെണ്‍കുട്ടിയുടെ ദേഹത്ത് പെട്രോള്‍ ഒഴിച്ചതിന് ശേഷം യുവാവ് സ്വയം ആത്മഹത്യക്ക് ശ്രമിച്ചു.  കൊല്ലം നീണ്ടകര സ്വദേശി ആദര്‍ശ് (25), കായംകുളം സ്വദേശിനി എന്നിവരെയാണ്  ഗുരുതരമായി പൊള്ളലേറ്റ നിലയില്‍ കോട്ടയം മെഡിക്കല്‍ കോളജില്‍ പ്രവേശിപ്പിച്ചത്.

സംഭവത്തിനിടിയില്‍ ഇവരെ രക്ഷിക്കാന്‍ എത്തിയ സുഹൃത്തുക്കളായ അജ്മല്‍, അശ്വിന്‍ എന്നിവര്‍ക്കും പൊള്ളലേറ്റു. ഇവരും മെഡിക്കല്‍ കോളജില്‍ ചികിത്സയിലാണ്. സുഹൃത്തുക്കളുടെ നില ഗുരുതരമല്ല.

സംഭവത്തെക്കുറിച്ച് പൊലിസ് പറയുന്നത് ഇങ്ങനെ: ആദര്‍ശും പെണ്‍കുട്ടിയും തമ്മിലുള്ള പ്രണയബന്ധം വീട്ടുകാര്‍ അറിഞ്ഞത്  ഇരുവരും തമ്മില്‍ തര്‍ക്കത്തിനിടയാക്കി. തുടര്‍ന്ന് ആദര്‍ശ് പെണ്‍കുട്ടിയുടെ ശരീരത്തില്‍ പെട്രോള്‍ ഒഴിക്കുകയായിരുന്നു. പെണ്‍കുട്ടി പരിഭ്രാന്തിയില്‍ കോളജ് ലൈബ്രറിക്കുള്ളിലേക്ക് ഓടിക്കയറി. പിന്നാലെ എത്തിയ ആദര്‍ശ് തന്റെ ശരീരത്തിലും പെട്രോള്‍ ഒഴിച്ച ശേഷം തീകൊളുത്തുകയായിരുന്നു.

ആദര്‍ശിന്റെ ശരീരത്തില്‍ 80 ശതമാനവും പെണ്‍കുട്ടിയുടെ ശരീരത്തില്‍ 60 ശതമാനവും പൊള്ളലേറ്റിട്ടുണ്ട്. ഇരുവരും അതീവ ഗുരുതരാവസ്ഥയിലാണെന്ന് മെഡിക്കല്‍ കോളജ് ആശുപത്രി അധികൃതര്‍ അറിയിച്ചു.