പരപ്പനങ്ങാടി: വൈദ്യുതിത്തൂണിന്റെ മുകള്‍ ഭാഗം ദ്രവിച്ച് മുറിയാനായ രീതിയില്‍ നില്‍ക്കുന്നത് അപകടഭീഷണി ഉയര്‍ത്തുന്നു. അഞ്ചപ്പുര ബീച്ച് റോഡിലാണ്  ഇരുമ്പ്  കൊണ്ട് നിര്‍മിച്ച തൂണ്‍ കാലപ്പഴക്കത്താല്‍ ദ്രവിച്ച് കിടക്കുന്നത്. നല്ല കാറ്റ് വീശിയാല്‍ തന്നെ തൂണ്‍ തകര്‍ന്ന് വീഴാമെന്നതിനാല്‍  പ്രദേശവാസികള്‍  ഭീതിയിലാണ്.
നഗരസഭാ വാര്‍ഡ് കൗണ്‍സിലര്‍ കടവത്ത് സൈതലവി കെ.എസ്.ഇ.ബി അധികൃതരെ വിവരം അറിയിക്കുകയും നിവേദനം നല്‍കുകയും ചെയ്തിട്ടുണ്ടെങ്കിലും യാതൊരു നടപടികളും സ്വീകരിച്ചിട്ടില്ലെന്നാണ് വിവരം.
പരപ്പനങ്ങാടി എസ്.എന്‍.എം സ്‌കൂള്‍ വിദ്യാര്‍ഥികളടക്കം നൂറുകണക്കിനാളുകള്‍ കടന്നു പോകുന്നത് ഈ റോഡിലൂടെയാണ്. പോസ്റ്റ് തകര്‍ന്നുവീണാല്‍ ഇതുവഴിയുള്ള വൈദ്യുതക്കമ്പികളും നിലംപതിക്കും. ഇത് വന്‍ ദുരന്തത്തിന് തന്നെ കാരണമാവും.
വര്‍ഷങ്ങള്‍ പഴക്കമുള്ള ഇരുമ്പ്  കൊണ്ടുള്ള തൂണുകളെല്ലാം നീക്കം ചെയ്ത് കോണ്‍ക്രീറ്റ് പോസ്റ്റുകള്‍ സ്ഥാപിക്കണമെന്ന ആവശ്യവും ശക്തമായിട്ടുണ്ട്.
ഒരാഴ്ച്ച മുമ്പ് കോഴിക്കോട് റോഡില്‍ ഇരുമ്പ് വൈദ്യുതി തൂണ്‍ മുറിഞ്ഞു വീണ് മണിക്കൂറുകളോളം ഗതാഗതം തടസപ്പെട്ടിരുന്നു.