ജിദ്ദ: സഊദിയില്‍ സ്വദേശിവത്കരണത്തിനിടെ കഴിഞ്ഞ ഒമ്പതു മാസത്തിനിടയില്‍ വിദേശ തൊഴിലാളികളെ റിക്രൂട്ട് ചെയ്യുന്നതിന് ഗവണ്‍മെന്റ് സ്ഥാപനങ്ങള്‍ക്കും സ്വകാര്യ സ്ഥാപനങ്ങള്‍ക്കും തൊഴില്‍ സാമൂഹിക വികസന മന്ത്രാലയം അനുവദിച്ചത് ഒരു ലക്ഷത്തിലധികം വിസ. ഇതില്‍ 94.5 ശതമാനം വിസകളും പുരുഷ തൊഴിലാളികളെ റിക്രൂട്ട് ചെയ്യുന്നതിനാണ് അനുവദിച്ചത്.

2017 ജനുവരി ഒന്ന് മുതല്‍ സെപ്തംബര്‍ 30വരെയുള്ള കാലത്ത് 1,07,470 പുരുഷ തൊഴിലാളികളെയും 6,191 വനിതാ തൊഴിലാളികളെയും റിക്രൂട്ട് ചെയ്യുന്നതിനാണ് സര്‍ക്കാര്‍ വകുപ്പുകള്‍ വിസകള്‍ അനുവദിച്ചത്. അതേ സമയം കഴിഞ്ഞ വര്‍ഷം സര്‍ക്കാര്‍ വകുപ്പുകള്‍ റിക്രൂട്ട് ചെയ്ത വിദേശ തൊഴിലാളികളില്‍ 40 ശതമാനം ഏഷ്യന്‍ വംശജരാണ്. 65 ശതമാനം വിസകള്‍ ആരോഗ്യ, വിദ്യാഭ്യാസ മേഖലകള്‍ക്കാണ് അനുവദിച്ചത്. ഇതില്‍ ഏറ്റവും കൂടുതല്‍ വിസകള്‍ നേടിയത് റിയാദ് പ്രവിശ്യയിലെ സര്‍ക്കാര്‍ വകുപ്പുകളും സ്ഥാപനങ്ങളുമാണ്.

കഴിഞ്ഞ കൊല്ലം ആദ്യത്തെ ഒമ്പതു മാസത്തിനിടെ ഗവണ്‍മെന്റ് വകുപ്പുകള്‍ക്ക് ആകെ ആനുവദിച്ച വിസകളില്‍ 25 ശതമാനം റിയാദ് പ്രവിശ്യയിലെ സ്ഥാപനങ്ങള്‍ക്കായിരുന്നു.
2016ല്‍ സ്വകാര്യ മേഖലക്ക് അനുവദിച്ച വിസകളില്‍ 29 ശതമാനം കുറവ് രേഖപ്പെടുത്തിയിരുന്നു. 2016ല്‍ സ്വാകര്യ മേഖലാ സ്ഥാപനങ്ങള്‍ക്ക് ആകെ 14 ലക്ഷം വിസയാണ് അനുവദിച്ചത്. 2015ല്‍ 19.7 ലക്ഷം തൊഴില്‍ വിസകള്‍ സ്വകാര്യ സ്ഥാപനങ്ങള്‍ക്ക് അനുവദിച്ചിരുന്നു. സ്വകാര്യ മേഖലയിലെ തൊഴിലാളികള്‍ക്ക് അനുവദിച്ച വര്‍ക്ക് പെര്‍മിറ്റുകളുടെ എണ്ണം 2016ല്‍ മൂന്നു ശതമാനം കുറഞ്ഞിരുന്നു. ഏഴു വര്‍ഷത്തിനു ശേഷം ആദ്യമായാണ് വര്‍ക്ക് പെര്‍മിറ്റുകളുടെ എണ്ണം കുറയുന്നത്.