എരുമപ്പെട്ടി: വൈക്കോല്‍ കയറ്റി കൊണ്ടുപോവുകയായിരുന്ന ലോറിക്ക് തീപിടിച്ചു. തീ പടരുന്നതു കണ്ട് നാട്ടുകാര്‍ ബഹളം വെച്ചതിനാല്‍ വന്‍ ദുരന്തം ഒഴിവായി. ഇന്ന് ഉച്ചതിരിഞ്ഞ് 2.30 യോടെ എയ്യാല്‍ നിര്‍മ്മല മാതാ സ്‌കൂളിനു സമീപത്തു വെച്ച് വൈദ്യുത കമ്പിയില്‍ തട്ടിയാണ് അഗ്‌നിബാധ ഉണ്ടായത്.
എയ്യാലില്‍ നിന്നും പുതുരുത്തിയിലേക്ക് വൈക്കോല്‍ കയറ്റി കൊണ്ടുപോവുകയായിരുന്ന ലോറിക്കാണ് തീപിടിച്ചത്. അളവില്‍ കൂടുതല്‍ വൈക്കോല്‍ കെട്ടിവെച്ചിരുന്നതിനാല്‍ വൈദ്യുത കമ്പിയില്‍ തട്ടിയാണ് തീപിടുത്തം ഉണ്ടായിട്ടുള്ളതെന്ന് ദൃക്‌സാക്ഷികള്‍ പറയുന്നു.
തീ കത്തി പിടിച്ചിട്ടും ഇതൊന്നുമറിയാതെ നിര്‍ത്താതെ പോവുകയായിരുന്ന വാഹനത്തെ നാട്ടുകാര്‍ ബഹളം വെച്ച് തടഞ്ഞ് നിര്‍ത്തുകയായിരുന്നു. വാഹനം ഭാഗികമായും, വൈക്കോല്‍ പൂര്‍ണ്ണമായും അഗ്‌നിയിലമര്‍ന്നു. തുടര്‍ന്ന് നാട്ടുകാരും അസിസ്റ്റന്റ് സ്റ്റേഷന്‍ ഓഫിസര്‍ പി.കെ പ്രമോദിന്റെ നേതൃത്വത്തില്‍ കുന്നംകുളത്ത് നിന്നെത്തിയ ഫയര്‍ഫോഴ്‌സും ചേര്‍ന്ന് തീയണച്ചു. അപകടത്തില്‍ ആര്‍ക്കും പരുക്കില്ല.