തിരുവനന്തപുരം: പ്രമുഖ കമ്യൂണിസ്റ്റ് നേതാവ് എകെ.ജിയെ ബാലപീഡകനെന്നു വിശേഷിപ്പിച്ചുകൊണ്ടുള്ള വി.ടി ബല്‍റാം എം.എല്‍.എയുടെ പരാമര്‍ശത്തിനെതിരേ പ്രതിഷേധം വ്യാപകം. സി.പി.എം നേതാക്കളും പ്രവര്‍ത്തകരും പ്രസ്താവനകളിലൂടെയും ഫേസ്ബുക്ക് കുറിപ്പുകളിലൂടെയും രൂക്ഷമായ വിമര്‍ശനമുന്നയിക്കുകയും ആക്ഷേപകരമായ പരാമര്‍ശങ്ങള്‍ നടത്തുകയും ചെയ്യുമ്പോള്‍ പറഞ്ഞതില്‍ താന്‍ ഉറച്ചുനില്‍ക്കുന്നതായി ഫേസ്ബുക്ക് കുറിപ്പില്‍ വ്യക്തമാക്കി. 

എ.കെ.ജിയും സുശീലയും തമ്മിലുള്ള പ്രണയവും വിവാഹവും അടിസ്ഥാനമാക്കിയാണ് ബല്‍റാമിന്റെ പരാമര്‍ശങ്ങള്‍. ഇതിനുള്ള വിമര്‍ശനങ്ങള്‍ക്ക് ഹിന്ദു പത്രത്തില്‍ വന്ന ഒരു വാര്‍ത്തയും എ.കെ.ജിയുടെ ആത്മകഥയും തെളിവാക്കി കാട്ടിയാണ് ബല്‍റാം മറുപടി നല്‍കുന്നത്.
പറഞ്ഞതില്‍ ഉറച്ചുനില്‍ക്കുന്നു എന്ന വ്യക്തമാക്കിക്കൊണ്ടുള്ള പോസ്റ്റ് ഇങ്ങനെ: 'ഒരു ദശാബ്ദത്തോളം നീണ്ടുനിന്ന പ്രണയത്തിനൊടുവിലാണ് എ.കെ ഗോപാലന്‍ എന്ന മധ്യവയസ്‌കനായ വിപ്ലവകാരി സുശീലയെ വിവാഹം കഴിച്ചതെന്ന് ആ വാര്‍ത്തയില്‍ ഹിന്ദു ലേഖകന്‍ കൃത്യമായി പറയുന്നു.
നമുക്കറിയാവുന്ന ചരിത്രമനുസരിച്ചാണെങ്കില്‍ വിവാഹസമയത്ത് സുശീലയുടെ പ്രായം 22 വയസ്സ്. ആ നിലക്ക് പത്ത് വര്‍ഷത്തോളം നീണ്ട പ്രണയാരംഭത്തില്‍ അവര്‍ക്ക് എത്ര വയസ്സുണ്ടായിരിക്കുമെന്ന് കണക്കുകൂട്ടാവുന്നള്ളൂ. 1940കളുടെ തുടക്കത്തില്‍ സുശീലയുടെ വീട്ടില്‍ എ.കെ.ജി ഒളിവില്‍ കഴിഞ്ഞപ്പോഴാണ് അവര്‍ ആദ്യം കാണുന്നതെന്നും അടുപ്പമുണ്ടാക്കിയതെന്നും വാര്‍ത്തയില്‍ പറയുന്നു. 1929 ഡിസംബറില്‍ ജനിച്ച സുശീലക്ക് 1940ന്റെ തുടക്കത്തില്‍ പത്തോ പതിനൊന്നോ വയസ്സേ ഉണ്ടാകുകയുള്ളൂ എന്നും വ്യക്തം.
ഒളിവില്‍ കഴിയുന്ന കാലത്ത് അഭയം നല്‍കിയ വീട്ടിലെ സ്‌കൂള്‍ വിദ്യാര്‍ഥിനി ആയിരുന്ന കുസൃതിക്കുട്ടിയുമായുള്ള സഹവാസവും ആ കൊച്ചുകുട്ടിയെ ജീവിതത്തിലേക്ക് ക്ഷണിക്കുന്ന കാര്യത്തില്‍ ആദ്യം തോന്നിയ കുറ്റബോധവും പിന്നെ അതിനെ മറികടന്നതുമൊക്കെ എ.കെ.ജിയുടെ തന്നെ വാക്കുകളില്‍ സ്പഷ്ടമായി വിരിഞ്ഞുവരുന്നുണ്ട്.
ഒളിവു ജീവിതത്തിനു ശേഷം പിടിക്കപ്പെട്ട് അദ്ദേഹം ജയിലില്‍ കഴിയുന്ന കാലത്ത് പുറത്ത് പ്രണയാര്‍ദ്രമായ മനസ്സുമായി കാത്തിരുന്ന സുശീലയെക്കുറിച്ചും അദ്ദേഹം തന്നെ മനസ്സു തുറക്കുന്നു. ജയിലില്‍ നിന്ന് പുറത്തുകടന്നാലുടന്‍ വിവാഹിതരാകാന്‍ അവര്‍ തീരുമാനിക്കുന്നു. അങ്ങനെ ജയില്‍മോചിതനായ ശേഷം ആദ്യഭാര്യ ജീവിച്ചിരിക്കേത്തന്നെ എ.കെ.ജിയുടെ രണ്ടാം വിവാഹം സുശീലയുമായി നടക്കുകയും ചെയ്യുന്നു. പ്രസ്ഥാനത്തോടും അതിന്റെ അതികായനായ നേതാവിനോടും ഒരു കൊച്ചുകുട്ടിക്ക് തോന്നുന്ന ആരാധനയും തിരിച്ച് നേതാവിന് മൈനറായ കുട്ടിയോട് തോന്നുന്ന 'മമത'യും ആത്മകഥയില്‍നിന്ന് നമുക്ക് വായിച്ചെടുക്കാം.
എ.കെ.ജി. പലര്‍ക്കും വിഗ്രഹമായിരിക്കാം. അദ്ദേഹത്തിന്റെ പൊതുപ്രവര്‍ത്തനത്തെയും പാര്‍ലമെന്ററി പ്രവര്‍ത്തനത്തെയും കുറിച്ച് ഏവര്‍ക്കും മതിപ്പുമുണ്ട്. എന്നുവച്ച് അദ്ദേഹത്തിന്റെ വ്യക്തിജീവിതത്തേക്കുറിച്ച് പബ്ലിക് ഡൊമൈനില്‍ ലഭ്യമായ വിവരങ്ങള്‍ ആരും ആവര്‍ത്തിക്കരുത് എന്ന് ഭക്തന്മാര്‍ വാശിപിടിച്ചാല്‍ അത് എപ്പോഴും നടന്നു എന്ന് വരില്ല.
മുന്‍പൊരിക്കല്‍ അഭിപ്രായം പറഞ്ഞ എഴുത്തുകാരന്‍ സക്കറിയയെ കായികമായി ആക്രമിച്ച് നിശബ്ദനാക്കിയെന്ന് വച്ച് അത്തരം അസഹിഷ്ണുത എപ്പോഴും വിജയിക്കില്ല'- ബല്‍റാം കുറിപ്പില്‍ പറയുന്നു. പറയേണ്ടത് പറഞ്ഞിട്ടേ പോകുന്നുള്ളൂ എന്ന ഹാഷ്ടാഗോടെയാണ് ബല്‍റാം കുറിപ്പ് അവസാനിപ്പിക്കുന്നത്.
സഭ്യതയുടെ പരിധി കടക്കുന്ന തരത്തിലുള്ള പരാമര്‍ശങ്ങളോടെയാണ് സി.പി.എം പ്രവര്‍ത്തകര്‍ പ്രതികരിക്കുന്നത്. ബല്‍റാമിനെ അധിക്ഷേപിക്കുന്ന തരത്തിലുള്ള പ്രതികരണങ്ങള്‍ അദ്ദേഹത്തിന്റെ ഫേസ്ബുക്ക് പേജില്‍ നിറയുകയാണ്.