റാഞ്ചി:ബി.ജെ.പിക്ക് കീഴടങ്ങുന്നതിനേക്കാള്‍ തനിക്ക് താല്‍പര്യം മരിക്കാനാണെന്ന് ലാലുപ്രസാദ് യാദവ്. കാലിത്തീറ്റ കുംഭകോണ കേസുമായി ബന്ധപ്പെട്ട ശിക്ഷാ വിധിക്കു പിന്നാലെയാണ് ട്വിറ്ററില്‍ അദ്ദേഹം ഇത്തരത്തില്‍ അഭിപ്രായപ്പെട്ടത്.
അനുസരിക്കുക, അല്ലെങ്കില്‍ ഞങ്ങള്‍ കുരുക്കിടും എന്ന ബി.ജെ.പിയുടെ അന്ത്യശാസനം അനുസരിക്കുന്നതിനേക്കാള്‍, സാമൂഹിക നീതിക്കും ഒരുമക്കും സമത്വത്തിനും വേണ്ടി മരിക്കാനാണ് ഞാന്‍ ഇഷ്ടപ്പെടുന്നതെന്നും ലാലു പറഞ്ഞു.
കോടതി ശിക്ഷ വിധിക്കുന്നതിന് തൊട്ടുമുന്‍പായി മക്കളായ തേജസ്വി യാദവും തേജ്പാല്‍ യാദവും വിളിച്ചു ചേര്‍ത്ത വാര്‍ത്താ സമ്മേളനത്തില്‍ ലാലുവിനെതിരായ കേസുകള്‍ക്കു പിന്നില്‍ ബി.ജെ.പിയും ബിഹാര്‍ മുഖ്യമന്ത്രി നിതീഷ് കുമാറുമാണെന്ന് അവര്‍ ആരോപിച്ചിരുന്നു.
ബി.ജെ.പിയുമായി ഒത്തുതീര്‍പ്പിന് ലാലു ശ്രമിച്ചിരുന്നെങ്കില്‍ അദ്ദേഹത്തെ അവര്‍ രാജാ ഹരിശ്ചന്ദ്രനെപോലെ സത്യസന്ധനായി പരിഗണിക്കുമായിരുന്നുവെന്നും ഇരുവരും പറഞ്ഞു.