കുറ്റിക്കോല്‍: കര്‍ഷകരുടെ പ്രതീക്ഷകളെ തകര്‍ത്തു കാട്ടാന ശല്യം രൂക്ഷമാവുന്നു. കുറ്റിക്കോല്‍ പഞ്ചായത്തിലെ ബേത്തൂര്‍പാറ കോളിക്കുണ്ടിലാണു കഴിഞ്ഞ ദിവസം പുലര്‍ച്ചെയോടെ കാട്ടാനകള്‍ ഇറങ്ങിയത്. കൂട്ടമായെത്തിയ ഇവ കവുങ്ങുകളും വാഴകളുമടക്കം കാര്‍ഷിക വിളകള്‍ വ്യാപകമായി നശിപ്പിച്ചു.
കോളിക്കുണ്ടിലെ കെ നാരായണന്‍, കുഞ്ഞിരാമന്‍, തീര്‍ഥക്കരയിലെ കുഞ്ഞമ്പു എന്നിവരുടെ കവുങ്ങിന്‍ തോട്ടങ്ങളിലും നെല്‍കൃഷിയിടങ്ങളിലും കയറി വ്യാപകമായി നഷ്ടം ഉണ്ടാക്കി. കാട്ടാനകള്‍ നശിപ്പിച്ച കൃഷിയിടങ്ങള്‍ കാറടുക്ക ബ്ലോക്ക് പഞ്ചായത്തംഗം കെ.ടി രാഗിണി, പഞ്ചായത്ത് അംഗം കെ മണികണ്ഠന്‍, മുന്‍ പഞ്ചായത്ത് പ്രസിഡന്റ് സി ബാലന്‍, കെ അശോകന്‍, വനം വകുപ്പ് ഉദ്യോഗസ്ഥര്‍ സന്ദര്‍ശിച്ചു.