കാട്ടിക്കുളം: നരി ശല്യം രൂക്ഷമായി തിരുനെല്ലി അപ്പപ്പാറ. കഴിഞ്ഞദിവസം രാത്രിയിറങ്ങിയ നരി രണ്ടു ആടുകളെ കടിച്ചു കൊന്നു. അപ്പപ്പാറ പാര്‍സിയിലെ അബ്ദുറഊഫിന്റെ ആടുകളെയാണ് കൊന്നത്. കഴിഞ്ഞ കുറച്ച് ദിവസങ്ങളായി പ്രദേശത്തുള്ള പത്തോളം വളര്‍ത്തു നായകളേയും നരി പിടികൂടിയിരുന്നു. ഇതു സംബന്ധിച്ച് നാട്ടുകാര്‍ പരാതി നല്‍കിയെങ്കിലും യാതൊരു നടപടിയുമുണ്ടായില്ല. നരിയെ പിടികൂടാനുള്ള സംവിധാനങ്ങള്‍ തങ്ങളുടെ പക്കലില്ലെന്ന് വനം വകുപ്പ് അധികൃതര്‍ ഒഴിയുകയായിരുന്നെന്നു നാട്ടുകാര്‍ ആരോപിക്കുന്നു. സന്ധ്യ മയങ്ങിയാല്‍ ജനവാസ കേന്ദ്രങ്ങളിലിറങ്ങുന്ന നരി പകല്‍ സമയങ്ങളില്‍ സ്വകാര്യ തോട്ടങ്ങളില്‍ പതുങ്ങിയിരിക്കുകയാണ്.
അതിരാവിലെ കുടകിലേക്കും മറ്റും തൊഴിലിന് പോകുന്നവരും മദ്‌റസാ വിദ്യാര്‍ഥികളും ഭീതിയോടെയാണ് സഞ്ചരിക്കുന്നത്. ശല്യക്കാരനായ നരിയെ പിടികൂടാന്‍ കൂട് സ്ഥാപിക്കണമെന്നതാണ് നാട്ടുകാരുടെ ആവശ്യം. അല്ലെങ്കില്‍ ശക്തമായ സമരവുമായി രംഗത്തിറങ്ങുമെന്നും നാട്ടുകാര്‍ പറയുന്നു.