കൊയിലാണ്ടി: കൊയിലാണ്ടിയിലെ സാംസ്‌കാരിക കൂട്ടായ്മയായ 'ശ്രദ്ധ' ആര്‍ട്ട് ഗാലറിയില്‍ ആരംഭിച്ച കേരള ലളിതകലാ അക്കാദമിയുടെ സഞ്ചരിക്കുന്ന ചിത്രശാല ശ്രദ്ധേയമാകുന്നു. നിരവധി പേരാണ് ചിത്രനിരീക്ഷണത്തിനായി ഗാലറിയില്‍ എത്തുന്നത്. ആസ്വാദകരില്‍ വിദ്യാര്‍ഥികളുടെ പങ്കാളിത്തമാണ് സംഘാടകര്‍ക്ക് പ്രചോദനമാകുന്നത്. സി.എന്‍ കരുണാകരന്‍, എം.വി ദേവന്‍, ജനാര്‍ദ്ദനന്‍ കോട്ടേമ്പ്രം, നേമം പുഷ്പരാജ്, നമ്പൂതിരി പുണിഞ്ചിത്തായ, ഉറൂബിന്റെ മകനും ചിത്രകാരനുമായ ഇ.സുധാകരന്‍ തുടങ്ങി കേരളത്തിനകത്തും പുറത്തുമുള്ള പ്രശസ്തരായ ചിത്രകാരന്മാരുടെ രചനകള്‍ പ്രദര്‍ശനത്തില്‍ ഉള്‍പ്പെടുത്തിയിട്ടുണ്ട്. ചിത്രകല പാഠ്യപദ്ധതിയുടെ ഭാഗമാക്കിയ സാഹചര്യത്തില്‍ പ്രദര്‍ശനത്തിന് പ്രസക്തിയേറുകയാണെന്ന് സംഘാടകര്‍ പറഞ്ഞു. പ്രദര്‍ശനം നാളെ സമാപിക്കും.