സിഡ്‌നി: ഇംഗ്ലണ്ടിനെതിരായ ആഷസ് പരമ്പരയിലെ അഞ്ചാം പോരാട്ടത്തില്‍ ആസ്‌ത്രേലിയക്ക് ലീഡ്. ഇംഗ്ലണ്ടിന്റെ ഒന്നാം ഇന്നിങ്‌സ് 346 റണ്‍സില്‍ അവസാനിപ്പിച്ച് ഒന്നാം ഇന്നിങ്‌സ് തുടങ്ങിയ ആസ്‌ത്രേലിയ മൂന്നാം ദിനം സ്റ്റംപെടുക്കുമ്പോള്‍ നാല് വിക്കറ്റ് നഷ്ടത്തില്‍ 479 റണ്‍സെന്ന മികച്ച നിലയില്‍. ആറ് വിക്കറ്റുകള്‍ കൈയിലിരിക്കേ ഓസീസിന് 133 റണ്‍സ് ലീഡ്.
കളി നിര്‍ത്തുമ്പോള്‍ മാര്‍ഷ് സഹോദരന്‍മാര്‍ അര്‍ധ സെഞ്ച്വറികളുമായി ക്രീസില്‍. സെഞ്ച്വറിക്ക് തൊട്ടരികെ നില്‍ക്കുന്ന ഷോണ്‍ മാര്‍ഷ് (98), മിച്ചല്‍ മാര്‍ഷ് (63) എന്നിവരാണ് ബാറ്റിങ് തുടരുന്നത്. നേരത്തെ ഉസ്മാന്‍ ഖവാജ നേടിയ ആറാം ടെസ്റ്റ് സെഞ്ച്വറി (171)യുടെ കരുത്തിലാണ് ഓസീസ് ലീഡിലേക്ക് കുതിച്ചത്. ക്യാപ്റ്റന്‍ സ്റ്റീവന്‍ സ്മിത്തും (83) തിളങ്ങി. രണ്ട് വിക്കറ്റ് നഷ്ടത്തില്‍ 193 റണ്‍സെന്ന ശക്തമായ നിലയിലാണ് ഓസീസ് മൂന്നാം ദിനം ബാറ്റിങ് പുനരാരംഭിച്ചത്. ഓസീസിന്റെ മൂന്നാം വിക്കറ്റ് വീഴ്ത്താന്‍ ഇംഗ്ലണ്ടിന് 274 റണ്‍സ് വരെ കാത്തിരിക്കേണ്ടി വന്നു. പിന്നീട് നാലാം വിക്കറ്റ് ലഭിക്കുന്നത് സ്‌കോര്‍ 375ല്‍ എത്തിയപ്പോഴാണ്. എന്നാല്‍ മാര്‍ഷ് സഹോദരന്‍മാര്‍ മികച്ച ബാറ്റിങുമായി കളം നിറഞ്ഞതോടെ മൂന്നാം ദിനം കൂടുതല്‍ നഷ്ടങ്ങളില്ലാതെ അവസാനിപ്പിക്കാന്‍ ഓസീസിനായി. ഇംഗ്ലീഷ് നിരയില്‍ ആന്‍ഡേഴ്‌സന്‍, ബ്രോഡ്, മോയിന്‍ അലി, അരങ്ങേറ്റക്കാരന്‍ മാസന്‍ ക്രെയ്ന്‍ എന്നിവര്‍ ഓരോ വിക്കറ്റ് വീഴ്ത്തി.