പെര്‍ത്ത്: ഹോപ്മാന്‍ കപ്പ് ടെന്നീസ് കിരീടം സ്വിറ്റ്‌സര്‍ലന്‍ഡിന്. ജര്‍മനിയെ കീഴടക്കിയാണ് സ്വിറ്റ്‌സര്‍ലന്‍ഡ് മൂന്നാം കിരീടം നേട്ടത്തിലെത്തിയത്. വിജയികളെ നിര്‍ണയിക്കുന്ന ഫാസ്റ്റ് ഫോര്‍ മിക്‌സഡ് ഡബിള്‍സ് പോരാട്ടത്തില്‍ ഇതിഹാസ താരം റോജര്‍ ഫെഡററും ബെലിന്ദ ബെന്‍സിക്കും ചേര്‍ന്ന സഖ്യം അലക്‌സാണ്ടര്‍ സ്വരേവ്- അഞ്ജലീക്ക് കെര്‍ബര്‍ സഖ്യത്തെ 4-3 (3), 4-2 എന്ന സ്‌കോറിന് പരാജയപ്പെടുത്തി സ്വിസ് ടീമിന് 2-1ന് വിജയം സമ്മാനിക്കുകയായിരുന്നു. നേരത്തെ പുരുഷ സിംഗിള്‍സില്‍ റോജര്‍ ഫെഡറര്‍- സ്വരേവിനെ 6-7 (4), 6-0, 6-2 എന്ന സ്‌കോറിന് പരാജയപ്പെടുത്തിയിരുന്നു. എന്നാല്‍ വനിതാ സിംഗിള്‍സില്‍ കെര്‍ബര്‍- ബെന്‍സിക്ക് പോരാട്ടത്തില്‍ കെര്‍ബര്‍ 6-4, 6-1 എന്ന സ്‌കോറിന് വിജയിച്ചതോടെയാണ് മിക്‌സഡ് ഡബിള്‍സ് പോരാട്ടം നിര്‍ണായകമായത്.
സ്വിസ് ടീമിനായി ഫെഡറര്‍ നേടുന്ന രണ്ടാമത്തെ ഹോപ്മാന്‍ കപ്പാണിത്. നേരത്തെ 2001ല്‍ മാര്‍ട്ടിന ഹിംഗിസിനൊപ്പം ഫെഡ് എക്‌സ്പ്രസ് നേട്ടമാഘോഷിച്ചിരുന്നു. സ്വിറ്റ്‌സര്‍ലന്‍ഡ് ടീം അവസാനമായി കിരീട നേട്ടം സ്വന്തമാക്കിയതും 2001ലായിരുന്നു. 17 വര്‍ഷങ്ങള്‍ക്ക് ശേഷമാണ് അവര്‍ വീണ്ടും കിരീടം സ്വന്തമാക്കുന്നത്. വരാനിരിക്കുന്ന ആസ്‌ത്രേലിയന്‍ ഓപണ്‍ പോരാട്ടത്തില്‍ കിരീടം നിലനിര്‍ത്താന്‍ ഒരുങ്ങുന്ന റോജര്‍ ഫെഡറര്‍ക്ക് ഹോപ്മാന്‍ കപ്പ് വിജയം ആത്മവിശ്വാസം നല്‍കും.
അതേസമയം ജര്‍മനിയുടെ ഹോപ്മാന്‍ കിരീട നേട്ടം ഇത്തവണയും നീണ്ടു. 1995ലാണ് ജര്‍മനി അവസാനമായി കിരീടം സ്വന്തമാക്കിയത്. അന്ന് ഇതിഹാസ താരം ബോറിസ് ബെക്കര്‍, ഹ്യൂബര്‍ എന്നിവരടങ്ങിയ ടീമാണ് കിരീടത്തില്‍ മുത്തമിട്ടത്.