കോട്ടയം: എ.കെ.ജിയ്‌ക്കെതിരായ വിവാദ പരാമര്‍ശത്തില്‍ വി.ടി ബല്‍റാം എം.എല്‍.എയെ കൈവിട്ട് ഉമ്മന്‍ചാണ്ടിയും. പരാമര്‍ശം പരിധി കടന്നതെന്നും, ഒരിക്കലും അങ്ങനെ പറയാന്‍ പാടില്ലായിരുന്നുവെന്നും ഉമ്മന്‍ചാണ്ടി പ്രതികരിച്ചു.

എ.കെ.ജിയുമായി ബന്ധപ്പെട്ട പരാമര്‍ശങ്ങള്‍ ഉള്‍പ്പെടുന്ന കുറിപ്പ് കഴിഞ്ഞദിവസമാണ് ബല്‍റാം സമൂഹമാധ്യമത്തില്‍ പോസ്റ്റ് ചെയ്തത്.എ.കെ.ജിയും സുശീലയും തമ്മിലുള്ള പ്രണയവും വിവാഹവും അടിസ്ഥാനമാക്കിയാണ് ബല്‍റാമിന്റെ പരാമര്‍ശങ്ങള്‍. ഇതിനുള്ള വിമര്‍ശനങ്ങള്‍ക്ക് ഹിന്ദു പത്രത്തില്‍ വന്ന ഒരു വാര്‍ത്തയും എ.കെ.ജിയുടെ ആത്മകഥയും തെളിവാക്കി കാട്ടിയാണ് ബല്‍റാം മറുപടി നല്‍കുന്നത്.

ബല്‍റാമിന്റെ പരാമര്‍ശത്തിനെതിരേ വ്യാപക പ്രതിഷേധമാണ് സാമൂഹികമാധ്യമങ്ങളില്‍ നടക്കുന്നത്. കോണ്‍ഗ്രസ് നേതാക്കളായ കെ.മുരളീധരന്‍, ഷാനിമോള്‍ ഉസ്മാന്‍ തുടങ്ങിയവരും ബല്‍റാമിന്റെ പരാമര്‍ശത്തെ എതിര്‍ത്ത് രംഗത്തെത്തിയിരുന്നു.