കണ്ണൂര്‍: രാജ്യത്തെ മികച്ച പത്ത് പൊലിസ് സ്റ്റേഷനുകളില്‍ ഒന്നായി വളപട്ടണം സ്റ്റേഷന്‍ തെരഞ്ഞെടുക്കപ്പെട്ടു. പ്രവര്‍ത്തനമികവിന്റെ അടിസ്ഥാനത്തില്‍ സ്‌റ്റേഷന് 9ാം സ്ഥാനമാണ്. മുഖ്യമന്ത്രി പിണറായി വിജയനാണ് തന്റെ ഫേസ്ബുക് പോസ്റ്റിലൂടെ വിവരം പുറത്തുവിട്ടത്. ദില്ലിയില്‍ കേന്ദ്ര ആഭ്യന്തര മന്ത്രിയാണ് വളപട്ടണത്തെ മികച്ച സ്റ്റേഷനായി തെരഞ്ഞെടുത്ത പ്രഖ്യാപനം നടത്തിയത്. കുറ്റാന്വേഷണ മികവ്, ക്രമസമാധാന പരിപാലന രംഗത്തെ ജാഗ്രത, കേസുകള്‍ കൈകാര്യം ചെയ്ത രീതി, ജനങ്ങളും പൊലിസും തമ്മിലുള്ള ബന്ധം, ശുചിത്വം തുടങ്ങി മുപ്പതോളം ഘടകങ്ങളെ അടിസ്ഥാനപ്പെടുത്തിയാണ് വളപട്ടണത്തിന് ഈ അംഗീകാരം.കഴിഞ്ഞ ആറുമാസമായി വളപട്ടണത്തെ പ്രവര്‍ത്തനങ്ങള്‍ കേന്ദ്രസംഘം നിരീക്ഷിക്കുന്നുണ്ട്. സ്റ്റേഷന്റെ പ്രവര്‍ത്തനം വിലയിരുത്താന്‍ കേന്ദ്രസംഘം വളപട്ടണത്ത് എത്തിയിരുന്നു. വീടുകളിലെത്തി ജനങ്ങളുടെ അഭിപ്രായം കൂടി പരിഗണിച്ച ശേഷമാണ് കേന്ദ്രസംഘം പൊലിസ് സ്റ്റേഷന് മാര്‍ക്കിട്ടത്. മികച്ച നേട്ടം കൊയ്ത കേരളാ പൊലിസിനെ മുഖ്യമന്ത്രി ഫേസ്ബുക്കിലൂടെ അഭിനന്ദിച്ചു. കേരളത്തിലെ പൊലിസ് സേനക്കാകെ അഭിമാനിക്കാവുന്ന നേട്ടമാണ് വളപട്ടണത്തിന്റേത് എന്ന് മുഖ്യമന്ത്രി പറഞ്ഞു.