മാഡ്രിഡ്: സ്പാനിഷ് കിങ്‌സ് കപ്പിന്റെ ആദ്യപാദ സെമിയില്‍ ബാഴ്‌സലോണയ്ക്ക് ജയം. കരുത്തരായ അത്‌ലറ്റിക്കോയെ അവരുടെ തട്ടകത്തില്‍ കീഴടക്കിയ ബാഴ്‌സ ഫൈനലിലേക്ക് കൂടുതല്‍ അടുത്തു. ഒന്നിനെതിരേ രണ്ടു ഗോളുകള്‍ക്ക് വിജയിച്ച കറ്റാലന്‍ പടയ്ക്ക് എവേ ഗോളിന്റെ ആനുകൂല്യവുമായി സ്വന്തം തട്ടകത്തില്‍ രണ്ടാംപാദ പോരാട്ടത്തിനിറങ്ങാം. കളിയുടെ ഏഴാം മിനുട്ടില്‍ സുവാരസും 33ാം മിനുട്ടില്‍ ലയണല്‍ മെസ്സിയും ബാഴ്‌സയ്ക്കായി വല കുലുക്കിയപ്പോള്‍ അത്‌ലറ്റിക്കോയുടെ ആശ്വാസ ഗോള്‍ 59ാം മിനുട്ടില്‍ അന്റോയിന്‍ ഗ്രിസ്മാന്‍ നേടി.

കിരീട വഴിയില്‍ തിരിച്ചെത്തി
മാഞ്ചസ്റ്റര്‍ സിറ്റി
ലണ്ടന്‍: വെസ്റ്റ് ഹാം യുനൈറ്റഡിനെ മറുപടിയില്ലാത്ത നാലു ഗോളുകള്‍ക്ക് തകര്‍ത്ത് മാഞ്ചസ്റ്റര്‍ സിറ്റി കിരീട പോരാട്ടത്തിന്റെ വഴിയില്‍ തിരിച്ചെത്തി. അതേസമയം മാഞ്ചസ്റ്റര്‍ യുനൈറ്റഡിനെ ഹള്‍ സിറ്റി ഗോള്‍രഹിത സമനിലയില്‍ തളച്ചു. കരുത്തരായ എവര്‍ട്ടനെ സ്റ്റോക് സിറ്റി 1-1നു സമനിലയില്‍ കുരുക്കി.
ഡി ബ്രുയ്‌നെ, ഡേവിഡ് സില്‍വ, ഗബ്രിയേല്‍ ജീസസ്, യായ ടൂറെ എന്നിവരാണ് സിറ്റിക്കായി വല ചലിപ്പിച്ചത്. ജയത്തോടെ 46 പോയിന്റുമായി സിറ്റി അഞ്ചാമത്. ഇത്രയും പോയിന്റുള്ള ലിവര്‍പൂള്‍ നാലാമതും ഒരു പോയിന്റ് അധികം സ്വന്തമാക്കി ടോട്ടനം ആഴ്‌സണല്‍ ടീമുകള്‍ രണ്ടും മൂന്നും സ്ഥാനത്ത്.
സ്വന്തം മൈതാനമായ ഓള്‍ഡ് ട്രോഫോര്‍ഡില്‍ ഹള്‍ സിറ്റിയുമായി വഴങ്ങിയ ഗോള്‍രഹിത സമനില മാഞ്ചസ്റ്റര്‍ യുനൈറ്റഡിനെ വീണ്ടും കിരീട സാധ്യതകളില്‍ നിന്നു അകറ്റി. നിലവില്‍ 42 പോയിന്റുമായി അവര്‍ ആറാമത്.