ഡര്‍ബന്‍: ശ്രീലങ്കക്കെതിരായ രണ്ടാം ഏകദിനത്തില്‍ ദക്ഷിണാഫ്രിക്കയ്ക്ക് വിജയം. 121 റണ്‍സിനാണ് ദക്ഷിണാഫ്രിക്ക വിജയം പിടിച്ചത്. ആദ്യം ബാറ്റു ചെയ്ത ദക്ഷിണാഫ്രിക്ക 50 ഓവറില്‍ ആറു വിക്കറ്റ് നഷ്ടത്തില്‍ 307 റണ്‍സെടുത്തപ്പോള്‍ ലങ്കന്‍ പോരാട്ടം 37.5 ഓവറില്‍ 186 റണ്‍സില്‍ അവസാനിച്ചു. 36 റണ്‍സെടുത്ത ദിനേഷ് ചാന്‍ഡിമലാണു ലങ്കന്‍ ടോപ് സ്‌കോറര്‍. ദക്ഷിണാഫ്രിക്കക്കായി പാര്‍നെല്‍, ഇമ്രാന്‍ താഹിര്‍, ഡുമിനി എന്നിവര്‍ രണ്ടു വീതം വിക്കറ്റുകള്‍ വീഴ്ത്തി.
ടോസ് നേടി ശ്രീലങ്ക ദക്ഷിണാഫ്രിക്കയെ ബാറ്റിങിനയക്കുകയായിരുന്നു. ഫാഫ് ഡുപ്ലസിസ് (105), ഡേവിഡ് മില്ലര്‍ (117) എന്നിവരുടെ സെഞ്ച്വറികളുടെ മികവിലാണ് ദക്ഷിണാഫ്രിക്കന്‍ സ്‌കോര്‍ 300 കടന്നത്. മില്ലര്‍ 98 പന്തില്‍ മൂന്നു ഫോറും ആറു സിക്‌സും പറത്തി. ഡുപ്ലസിസാണ് കളിയിലെ കേമന്‍. അഞ്ചു മത്സരങ്ങളടങ്ങിയ പരമ്പരയില്‍ ദക്ഷിണാഫ്രിക്ക 2-0ത്തിനു മുന്നില്‍.