റിയാദ്: യമനിലെ വിമത വിഭാഗമായ ഹൂതികളുടെ നിയന്ത്രണത്തില്‍നിന്ന് ഏകദേശം ഭാഗങ്ങള്‍ കീഴടക്കിയതായി സഖ്യസേനയുടെ അവകാശവാദം. 90 ശതമാനം മേഖലയും തിരിച്ചുപിടിച്ച ഔദ്യോഗിക സൈന്യം ഇപ്പോള്‍ തലസ്ഥാനനഗരിയായ സന്‍ആയുടെ ചില ഭാഗങ്ങള്‍ കൂടി കീഴടക്കാനുള്ള അവസാനവട്ട ഒരുക്കത്തിലാണെന്നാണു വിവരം.
ആഭ്യന്തരയുദ്ധത്തിനു ശേഷമുള്ള യമനിലെ നിര്‍ണായക മുന്നേറ്റമാണിതെന്നും സഖ്യസേനാ വക്താവ് കേണല്‍ തുര്‍ക്കി അല്‍ മാലികി മാധ്യമങ്ങളൊട് വ്യക്തമാക്കി.
ഹൂതികളെ തുരത്താന്‍ യമനിലെ ഏതു സേനയ്ക്കും സഖ്യസേനയ്‌ക്കൊപ്പം ചേരാമെന്നും മാലികി അറിയിച്ചു. ഇനിയുള്ള നീക്കങ്ങള്‍ നിര്‍ണായകമാണ്.
ഹൂതികളുടെ കരങ്ങളില്‍നിന്ന് യമന് പൂര്‍ണമോചനം സാധ്യമാക്കും. തലസ്ഥാനനഗരിക്ക് അരികിലെത്തിയ സഖ്യസേന ഹൂതികള്‍ക്കെതിരേ ആക്രമണം ശക്തമാക്കിയിട്ടുണ്ട്. സന്‍ആക്കു സമീപത്തെ പ്രവിശ്യകളെല്ലാം സഖ്യസേന തിരിച്ചുപിടിച്ചു.
യമന്‍ സൈന്യത്തിന്റെ സഹായത്തോടെയാണു സഖ്യസേനയുടെ മുന്നേറ്റം. 2013ല്‍ ആരംഭിച്ച യമനിലെ ആഭ്യന്തരയുദ്ധം 2015ഓടെ ശക്തമായതിനെ തുടര്‍ന്നാണ് സഊദി പ്രശ്‌നത്തില്‍ ഇടപെട്ട് ഹൂതികള്‍ക്കെതിരേ നടപടി തുടങ്ങിയത്.