കൊച്ചി: കേരളത്തിലെ ഏറ്റവും വലിയ പൊതുമേഖലാ സ്ഥാപനമായ ഫാക്ടിന് കേന്ദ്ര ബജറ്റില്‍ തുക നീക്കിവയ്ക്കാത്തത് പ്രതിഷേധാര്‍ഹമാണെന്ന് പബ്ലിക്ക് അക്കൗണ്ട്‌സ് കമ്മിറ്റി ചെയര്‍മാന്‍ പ്രൊഫ. കെ.വി. തോമസ് എം.പി കുറ്റപ്പെടുത്തി.യു.പി.എ സര്‍ക്കാര്‍ ഫാക്ടിന്റെ രക്ഷയ്ക്ക് തയാറാക്കിയ സാമ്പത്തിക പാക്കേജ് രണ്ടര വര്‍ഷമായി തടഞ്ഞുവയ്ക്കുകയും ഫാക്ടിന്റെ സ്ഥലം പണയപ്പെടുത്തി നൂറ് കോടി രൂപയുടെ വായ്പ ഭീമമായ പലിശയ്ക്ക് നല്‍കുകയും ചെയ്ത് സ്ഥാപനത്തെ വീണ്ടും കടക്കെണിയിലാക്കുകയാണ് ബി.ജെ.പി സര്‍ക്കാര്‍ ചെയ്തത്.
18 മാസത്തിലേറെയായി ശമ്പളം പോലുമില്ലാത്ത എച്ച്.ഒ.സിയെ രക്ഷിക്കാനും നടപടിയില്ല. എച്ച്.എം.ടി യൂണിറ്റുകളില്‍ ലാഭകരമായി പ്രവര്‍ത്തിക്കുന്ന കളമശ്ശേരി യൂണിറ്റിനും ബജറ്റ് വിഹിതം നാമമാത്രമാണ്.
കൊച്ചി കപ്പല്‍ശാലയ്ക്ക് ബജറ്റ് വിഹിതം അനുവദിക്കാതെ സ്വന്തം ഫണ്ട് വിനിയോഗിക്കാനുള്ള അനുമതി മാത്രമാണ് നല്‍കിയത്. സ്വകാര്യവല്‍ക്കരണം പ്രഖ്യാപിച്ച കപ്പല്‍ശാലയുടെ ഭൂരിഭാഗം ഷെയറുകളും സ്വകാര്യവ്യക്തികള്‍ക്ക് നല്‍കാനുള്ള തീരുമാനത്തിന്റെ ഭാഗമാണ് ബജറ്റ് വിഹിതം നല്‍കാത്തത്.
കൊച്ചി തുറമുഖ ട്രസ്റ്റിന്റെ വികസനത്തിന് പല പദ്ധതികളും പ്രഖ്യാപിച്ചെങ്കിലും ഒന്നും നടപ്പാക്കാന്‍ തുക മാറ്റിവച്ചിട്ടില്ല. മെട്രോ പദ്ധതികള്‍ക്ക് അപ്പാടെ എന്ന രൂപത്തില്‍ തുക വകയിരുത്തിയിട്ടുണ്ടെങ്കിലും കൊച്ചിയ്ക്ക് എത്ര നല്‍കുമെന്ന വ്യക്തതയില്ലാത്തത് ദുരുദ്ദേശ്യപരമാണ്. റെയില്‍വെ സ്റ്റേഷനുകള്‍ രാജ്യാന്തര നിലവാരത്തിലേക്ക് ഉയര്‍ത്തുമെന്ന് പ്രഖ്യാപിച്ചെങ്കിലും മുന്‍ സര്‍ക്കാര്‍ പ്രഖ്യാപിച്ച കൊച്ചിയെയും തിരുവനന്തപുരത്തേയും ഉള്‍പ്പെടുത്താത്തത് പ്രതിഷേധാര്‍ഹമാണ്.
എറണാകുളം ഓള്‍ഡ് റെയില്‍വെ സ്റ്റേഷന്റെ പുനരുദ്ധാരണം ഇപ്പോഴും കടലാസിലാണ്. ബി.ജെ.പി സര്‍ക്കാരിന്റെ ആദ്യ ബജറ്റില്‍ പ്രഖ്യാപിച്ച എയിംസ് മൂന്നു തവണയും കേരളത്തിന് നല്‍കാതെ മനഃപൂര്‍വം കബളിപ്പിക്കുകയാണെന്നും പ്രൊഫ. കെ.വി. തോമസ് പറഞ്ഞു.