കാസര്‍കോട്: കോളജ് വിദ്യാര്‍ഥികളടക്കമുള്ളവര്‍ക്കു നിരോധിത ലഹരി ഗുളിക എത്തിച്ചു കൊടുക്കുന്ന ശൃംഖലയില്‍പ്പെട്ട യുവാവിനെ എക്‌സൈസ് അറസ്റ്റ് ചെയ്തു. മംഗളൂരു, കസബ, ബങ്കര സ്വദേശി മുഹമ്മദ് ഷക്കീറി(22)നെയാണു കഴിഞ്ഞ ദിവസം വൈകുന്നേരം കാസര്‍കോട് റെയില്‍വേ സ്റ്റേഷനില്‍ നിന്നു പിടികൂടിയത്. കേരളത്തില്‍ നിരോധിച്ചിട്ടുള്ള നൈട്രോവൈറ്റ്, നെട്രോ നൈഥാം എന്നീ ഗുളികകളാണ് ഇയാളില്‍ നിന്നു കണ്ടെത്തിയത്. ഓരോ ഗുളികക്കും 200 രൂപയാണ് യഥാര്‍ഥ വില. എന്നാല്‍ ആവശ്യക്കാര്‍ക്ക് ഇതിന്റെ ഇരട്ടി ഈടാക്കിയാണ് വില്‍പന നടത്തുന്നത്. കാഞ്ഞങ്ങാട്, കാസര്‍കോട് കേന്ദ്രീകരിച്ചു വിദ്യാര്‍ഥികള്‍ക്കിടയില്‍ ലഹരി ഗുളികകള്‍ വില്‍പന നടത്തുന്ന റാക്കറ്റ് വ്യാപകമായി പ്രവര്‍ത്തിക്കുന്നതായി നേരത്തെ എക്‌സൈസിനു വിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ഏറെക്കാലത്തെ നിരീക്ഷണത്തിനു ശേഷമാണ് മുഹമ്മദ് ഷക്കീറിനെ പിടികൂടിയതെന്ന് അധികൃതര്‍ പറഞ്ഞു.