കാഞ്ഞങ്ങാട്: അജാനൂര്‍ ഗവ.ഫിഷറീസ് യു.പി സ്‌കൂളിന്റെ 77 വര്‍ഷത്തെ ചരിത്രത്തെ ഓര്‍മപ്പെടുത്താന്‍ 77 മീറ്റര്‍ നീളത്തില്‍ വെള്ള കാന്‍വാസില്‍ ഹാജര്‍ പുസ്തകമൊരുക്കുന്നു. പൂര്‍വ വിദ്യാര്‍ഥികളുടെയും രക്ഷാകര്‍ത്താക്കളുടെയും ഈ ചരിത്ര സംഗമത്തില്‍ അഡ്മിഷന്‍ രജിസ്റ്ററില്‍ ആറാം നമ്പര്‍ വിദ്യാര്‍ഥി 87 വയസ്സുള്ള കൃഷ്ണന്‍ ആയത്താര്‍ പേരെഴുതി ആദ്യത്തെ ഒപ്പിടും. ചിത്താരി കടപ്പുറം മുതല്‍ ഹൊസ്ദുര്‍ഗ് കടപ്പുറം വരെയുള്ള കടലോരത്തെ ആദ്യത്തെ പ്രൈമറി വിദ്യാലയമാണിത്.
സ്‌കൂള്‍ വാടകക്കെട്ടിടത്തിലാണ് ഇപ്പോഴും പ്രവര്‍ത്തിക്കുന്നത്. സ്വന്തമായി സ്ഥലവും കെട്ടിടവും ലഭ്യമാക്കാന്‍ പൂര്‍വ വിദ്യാര്‍ഥികളും പി.ടി.എയും പരിശ്രമം നടത്തി വരുകയാണ്. സംഘാടക സമിതി ഇന്ന് മുതല്‍ സ്‌കൂളില്‍ സജ്ജീകരിക്കും.
സംഗമം 12ന് ഉച്ചയ്ക്കു രണ്ടിനു പി കരുണാകരന്‍ എം.പി ഉദ്ഘാടനം ചെയ്യും. പഞ്ചായത്ത് പ്രസിഡന്റ് പി ദാമോദരന്‍, വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ ബഷീര്‍ വെള്ളിക്കോത്ത് തുടങ്ങിയവര്‍ സംബന്ധിക്കും.