കൊണ്ടോട്ടി: രണ്ടു പതിറ്റാണ്ടു കാലം സമസ്തയുടെ ജനറല്‍ സെക്രട്ടറിയും നാലര പതിറ്റാണ്ട് കാലമായി കൊണ്ടോട്ടി ഖാസിയാരകം മഹല്ല് ഖാസിയുമായിരുന്ന സൈനുല്‍ ഉലമാ ചെറുശ്ശേരി സൈനുദ്ദീന്‍ മുസ്‌ലിയാരുടെ ഒന്നാം ഉറൂസും മഹല്ല് ഖാസിയായി പാണക്കാട് ഹൈദരലി ശിഹാബ് തങ്ങളുടെ സ്ഥാനാരോഹണവും നാളെ നടക്കും.ഖാസിയാരകം മദ്‌റസ അങ്കണത്തില്‍ പ്രത്യേകം സജ്ജമാക്കിയ ചെറുശ്ശേരി ഉസ്താദ് നഗറിലാണ് പരിപാടികള്‍ നടക്കുക.
പിതാവ് ചെറുശ്ശേരി മുഹമ്മദ് മുസ്‌ലിയാരുടെ നിര്യാണത്തെ തുടര്‍ന്ന് 1968 മുതല്‍ 2016 മരണം വരെ ഖാസിയാരകം ജുമുഅത്ത് പള്ളിയുടെ മഹല്ല് ഖാസിയായിരുന്നു ചെറുശ്ശേരി സൈനുദ്ദീന്‍ മുസ്‌ലിയാര്‍. ഉസ്താദിന്റെ ഒന്നാം ഉറൂസ് വിപുലമായി നടത്തുന്നതിനുള്ള വിപുലമായ ഒരുക്കങ്ങളാണ് സംഘാടക സമിതി പൂര്‍ത്തീകരിച്ചിരിക്കുന്നത്. നാളെ രാവിലെ 8.30ന് സൈനുല്‍ ഉലമയുടെ മഖാം സിയാറത്തോടെ പരിപാടികള്‍ക്ക് തുടക്കമാവും.
വൈകിട്ട് അഞ്ചിന് കോഴിക്കോട് വലിയ ഖാസി നാസര്‍ ഹയ്യ് ശിഹാബ് തങ്ങള്‍ ഖത്മുല്‍ ഖുര്‍ആന് നേതൃത്വം നല്‍കും.വൈകിട്ട് 6.30ന് പൊതുസമ്മേളനം സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. മഹല്ല് പ്രസിഡന്റ് സി.പി കുഞ്ഞാന്‍ അധ്യക്ഷനാകും. പാണക്കാട് ഹൈദരലി ശിഹാബ് തങ്ങള്‍ അനുഗ്രഹ പ്രഭാഷണം നടത്തും. സമസ്ത ജനറല്‍ സെക്രട്ടറി പൊഫ. കെ.ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സാദിഖ് മുസ്‌ലിയാര്‍, ജോയിന്റ് സെക്രട്ടറി എം.ടി അബ്ദുല്ല മുസ്‌ലിയാര്‍, കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, മുശാവറ അംഗം ഡോ.ബഹാഉദ്ദീന്‍ മുഹമ്മദ് നദ്‌വി, എസ്.കെ.പി.എം തങ്ങള്‍, ഷാജഹാന്‍ റഹ്മാനി കംബ്ലക്കാട്, കെ.സി മുഹമ്മദ് ബാഖവി സംസാരിക്കും.
എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ മുഖ്യപ്രഭാഷണം നടത്തും.
വാവാട് കുഞ്ഞിക്കോയ മുസ്‌ലിയാര്‍ ദിഖ്‌റ് ദുആ സംഗമത്തിന് നേതൃത്വം നല്‍കും. മഹല്ല് സെക്രട്ടറി കുഞ്ഞിമുഹമ്മദ് സ്വാഗതവും എം.അഹമ്മദ് കുട്ടി മാസ്റ്റര്‍ നന്ദിയും പറയും.