ജിദ്ദ: ആദ്യ സഊദി വനിതാ ദിനം രാജ്യം ഗംഭീരമായി ആഘോഷിക്കുന്നു. തലസ്ഥാന നഗരിയില്‍ മൂന്നു ദിവസത്തെ പരിപാടികളാണ് ഒരുക്കിയിരിക്കുന്നത്. ബുധനാഴ്ചയാണ് ആഘോഷപരിപാടികള്‍ക്ക് തുടക്കമിട്ടത്. റിയാദിലെ കിംഗ് ഫഹദ് കള്‍ച്ചറല്‍ സെന്ററില്‍ വനിതകളെ മാത്രം കാണികളാക്കിയാണ് പരിപാടി. 

സഊദി വനിതകളുടെ പ്രാധാന്യവും, വിവിധ മേഖലകളിലെ അവരുടെ നേട്ടങ്ങളും മറ്റുള്ളവരെ അറിയിക്കാനും ആഘോഷിക്കാനുമാണ് ഈ പരിപാടിയെന്ന് സെന്ററിന്റെ ജനറല്‍ സൂപ്പര്‍വൈസര്‍ മുഹമ്മദ് അല്‍ സൈഫ് പറഞ്ഞു. സ്ത്രീകള്‍ക്ക് മാത്രമായി ഒരുക്കിയിരിക്കുന്ന പരിപാടിയാണെങ്കിലും കുട്ടികള്‍ക്കായുള്ള പരിപാടികളില്‍ കുടുംബമായി പങ്കെടുക്കാമെന്ന് അദ്ദേഹം പറഞ്ഞു.
കഴിഞ്ഞ 50 വര്‍ഷത്തെ സഊദി വനിതകളുടെ നേട്ടമാണ് പരിപാടിയില്‍ എടുത്തു കാണിക്കുക. സഊദി കലാകാരന്മാരുടെയും ഫോട്ടോഗ്രാഫറുകളുടെയും കഴിവുകള്‍ പ്രദര്‍ശിപ്പിക്കുന്ന വില്‍പന കേന്ദ്രങ്ങളും ഇതോടൊപ്പമുണ്ടാകും. ഇതിനിടെയുള്ള ചര്‍ച്ചകളില്‍ സഊദി രാജകുമാരിമാര്‍ പങ്കെടുക്കുമെന്നും അദ്ദേഹം അറിയിച്ചു.