വടക്കഞ്ചേരി: ജൂവൈനല്‍ ഹോമില്‍ നിന്നും ചാടിയ നിരവധി മോഷണകേസിലെ പ്രതി അറസ്റ്റില്‍. കിഴക്കഞ്ചേരി പുന്നപ്പാടത്ത് വാടകക്ക് താമസിക്കുന്ന അമല്‍ജിത്ത് (18)നെയാണ് വടക്കഞ്ചേരി പൊലിസ് അറസ്റ്റ് ചെയ്തത്. കോഴിക്കോട് ജൂവൈനല്‍ ഹോമില്‍ നിന്നും ഈമാസം 22ന് പൂട്ട് പൊളിച്ച് ചാടി നിരവധി മോഷണം നടത്തിയശേഷമാണ് പ്രതി വടക്കഞ്ചേരിയില്‍ എത്തിയത്.
ജൂവൈനല്‍ ഹോമില്‍ നിന്നും ചാടിയ പ്രതി മലപ്പുറം കുറ്റിപ്പുറം തിരുവായില്‍ നിന്നും മോഷ്ടിച്ച ബൈക്കുമായി പട്ടാമ്പിയിലെത്തി. ബൈക്കിലെ പെട്രോള്‍ തീര്‍ന്നതിനെ തുടര്‍ന്ന് സമീപത്തെ കെട്ടിടം പണിനടക്കുന്ന സ്ഥലത്ത് നിന്ന് രണ്ട് ചുറ്റിക എടുത്ത് പെട്രോള്‍ ടാങ്ക് കുത്തി തുറക്കുകയും സമീപത്തുള്ള മൂന്ന് ബൈക്കുകളില്‍ നിന്നും പെട്രോള്‍ മോഷ്ടിച്ച് ഈ ബൈക്കിലൊഴിച്ചാണ് വടക്കഞ്ചേരിയില്‍ എത്തിയത്. വടക്കഞ്ചേരിയില്‍ എത്തിയ പ്രതി കമ്മാന്തറ റോഡിന് സമീപത്ത് നിന്നും സ്‌കൂട്ടര്‍ യാത്രക്കാരിയുടെ മാല കവരാനും ശ്രമം നടത്തിയിരുന്നു.
ഇതിന് ശേഷം രാത്രി പുന്നപ്പാടത്തേക്ക് പോകുന്നതിനിടെ കുണ്ടുകാട്ടില്‍ വെച്ച് അറസ്റ്റിലാവുകയായിരുന്നു. ഒരു വര്‍ഷത്തോളമായി കോഴിക്കോട് ജൂവനൈല്‍ ഹോമില്‍ കഴിഞ്ഞ് വന്നിരുന്ന അമല്‍ജിത്തിന്റെ പേരില്‍ ഇരുപതോളം കേസുകളുണ്ട്. പ്രായപൂര്‍ത്തിയാവാത്തതിനെ തുടര്‍ന്ന് ഇത്തരം കേസുകള്‍ വിചാരണ ചെയ്യപ്പെടാതെ കിടക്കുകയായിരുന്നു. ഈ മാസം 20നാണ് പ്രതിക്ക് 18 വയസ്സ് പൂര്‍ത്തിയായത്. കോഴിക്കോട് ജില്ലയിലെ കസബ, വെള്ളയില്‍, കണ്ണൂര്‍ ടൗണ്‍, പാലക്കാട് ടൗണ്‍ സൗത്ത്, ആലത്തൂര്‍, വടക്കഞ്ചേരി, ഒറ്റപ്പാലം  സ്റ്റേഷനുകളില്‍ മോഷണത്തിനും പിടിച്ച് പറിക്കും ചിറ്റൂര്‍ സ്റ്റേഷനില്‍ ഒരാളെ വാഹനമിടിച്ച് കൊന്ന സംഭവത്തിലും ഇയാള്‍ക്കെതിരെ കേസുണ്ട്.
വടക്കഞ്ചേരി മേഖലയില്‍ ബൈക്ക് മോഷണം, കടകളുടെ പൂട്ട് തകര്‍ത്തുള്ള മോഷണം എന്നിവയും പ്രതി സ്ഥിരമായി ചെയ്തു വരാറുണ്ടെന്ന് പൊലിസ് പറഞ്ഞു. കണ്ണൂര്‍ സ്വദേശിയായ അമല്‍ജിത്ത് രണ്ട് വര്‍ഷത്തോളമായി കിഴക്കഞ്ചേരി പുന്നപ്പാടത്താണ് വാടകക്ക് താമസിക്കുന്നത്. വടക്കഞ്ചേരി എസ്.ഐ കെ നാരായണന്‍, സിവില്‍ പൊലിസ് ഓഫിസര്‍ അനസ്, ഹോംഗാര്‍ഡ് ശശിധരന്‍ എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. കോടതി പ്രതിയെ റിമാന്റ് ചെയ്തു.