പള്ളിക്കല്‍: കാക്കഞ്ചേരി ജങ്ഷനിലെ അനധികൃത ബൈക്ക് പാര്‍ക്കിങ് ഗതാഗതക്കുരുക്കുണ്ടാക്കുണ്ടാക്കുന്നു. ദേശീയപാത കാക്കഞ്ചേരിയില്‍ നിന്നും കൊട്ടപ്പറം ഹൈവേ റോഡിലേക്കും കാലിക്കറ്റ് എയര്‍ പോര്‍ട്ടിലേക്കും നിരവധി വാഹനങ്ങള്‍ കടന്ന പോകുന്ന പള്ളിക്കല്‍ ബസാര്‍ റോഡ് ജങ്ഷനിലാണ് യാതൊരു നിയന്ത്രണവുമില്ലാതെ അനധികൃതമായി ബൈക്കുകള്‍ പാര്‍ക്ക് ചെയ്യുന്നത്. ഇത് മൂലം വീതി കുറഞ്ഞ പള്ളിക്കല്‍ ബസാര്‍ റോഡിലേക്ക് ദേശീയപാതയില്‍ നിന്നും ഹെവി വാഹനങ്ങള്‍ തിരിഞ്ഞു വരുമ്പോള്‍ എതിരേ പള്ളിക്കല്‍ ബസാര്‍ ഭാഗത്ത് നിന്നും വരുന്ന വാഹനങ്ങള്‍ക്ക് കടന്ന് പോകാന്‍ കഴിയാത്തതാണ് പലപ്പോഴും ഇവിടെ ഗതാഗതക്കുരുക്കിന് കാരണമാകുന്നത്.
നടപ്പാത കൈയ്യേറി ബൈക്കുകള്‍ പാര്‍ക്ക് ചെയ്യുന്നതിനാല്‍ കാല്‍നട യാത്രക്കാര്‍ ജങ്ഷനിലെ തിരക്ക് പിടിച്ച റോഡിലേക്ക് കയറി നടക്കേണ്ട അവസ്ഥയാണെന്നും ഇത് അപകടത്തിന് കാരണമാക്കുന്നതായും നാട്ടുകാര്‍ പരാതിപ്പെടുന്നു. നിയമ ലംഘനങ്ങള്‍ കണ്ടിട്ടും പൊലിസ് കണ്ടില്ലെന്ന് നടിക്കുന്നതാണ് ഇത്തരം ദുരിതങ്ങള്‍ക്ക് കാരണമാകുന്നതെന്നാണ് നാട്ടുകാര്‍ ആരോപിക്കുന്നത്.