തൊടുപുഴ: സംസ്ഥാനത്തേക്ക് പുറത്തു നിന്നും എത്തിക്കുന്നത് ഗ്രിഡ് ശേഷിയുടെ പരമാവധി വൈദ്യുതി. കൂടുതല്‍ വൈദ്യുതി എത്തിക്കാന്‍ ലൈനിന് ശേഷിയില്ലാത്തതിനാല്‍ ഇനി ആഭ്യന്തര ഉല്‍പാദനം ഉയര്‍ത്താതെ പിടിച്ചുനില്‍ക്കാന്‍ വൈദ്യുതി ബോര്‍ഡിന് കഴിയില്ല.

വിലകുറഞ്ഞ വൈദ്യുതി ലഭ്യമാകുന്ന സാഹചര്യം നിലവിലുണ്ടെങ്കിലും പ്രയോജനപ്പെടുത്താന്‍ കെ.എസ്.ഇ.ബി ക്ക് കഴിയുന്നില്ല. 58- 60 ദശലക്ഷം യൂനിറ്റ് വൈദ്യുതി എത്തിക്കാനുള്ള ശേഷിയാണ് ഇപ്പോള്‍ കേരളത്തിനുള്ളത്. 58.392 ദശലക്ഷം യൂനിറ്റ് വൈദ്യുതിയാണ് ഇന്നലെ എത്തിച്ചത്. ഉപഭോഗം കൂടുന്നതിനനുസരിച്ച് ആഭ്യന്തര ജലവൈദ്യുതി ഉല്‍പാദനം ഉയര്‍ത്തുകയല്ലാതെ മറ്റ് മാര്‍ഗമില്ല.

കോഴിക്കോട് ജില്ലയിലെ അരീക്കോട് സ്ഥാപിക്കുന്ന പവര്‍ ഗ്രിഡ് ട്രാന്‍സ്‌ഫോര്‍മര്‍ കമ്മിഷന്‍ ചെയ്താല്‍ രണ്ട് ദശലക്ഷം യൂനിറ്റ് വൈദ്യുതി കൂടി എത്തിക്കാനാകും. ഈ ട്രാന്‍സ്‌ഫോര്‍മര്‍ മാര്‍ച്ച് ആറോടെ കമ്മിഷന്‍ ചെയ്യാനാകുമെന്നാണ് പ്രതീക്ഷയെന്ന് കെ.എസ്.ഇ.ബി ലോഡ് ഡെസ്പാച്ച് സെന്റര്‍ ചീഫ് എന്‍ജിനീയര്‍ എന്‍.എന്‍. ഷാജി സുപ്രഭാതത്തോട് പറഞ്ഞു. മാടക്കത്തറ-പാലക്കാട്-അരീക്കോട് 400 കെ.വി സബ് സ്‌റ്റേഷന്‍ വഴിയാണ് ഇപ്പോള്‍ കൂടുതല്‍ വൈദ്യുതി എത്തിക്കുന്നത്. ഇന്നലെ എത്തിച്ച 58.392 ദശലക്ഷം യൂനിറ്റില്‍ 33.13 ദശലക്ഷവും എത്തിച്ചത് ഈ ലൈനിലൂടെയാണ്.

രൂക്ഷമായ വരള്‍ച്ച മുന്നില്‍കണ്ട്, കരുതല്‍ ജലശേഖരം ഉയര്‍ത്താന്‍ കഴിഞ്ഞ രണ്ടുമാസമായി ആഭ്യന്തര വൈദ്യുതി ഉല്‍പാദനം കുറച്ചിരിക്കുകയായിരുന്നു. ശരാശരി 50 ദശലക്ഷം യൂനിറ്റിന് മുകളില്‍ പുറമെ നിന്നും വൈദ്യുതി എത്തിച്ചിരുന്നു. എന്നാല്‍ വൈദ്യുതി ഉപഭോഗം ഉയരുന്ന സാഹചര്യം ഉണ്ടായതാണ് പ്രശ്‌നമായത്. 66.848 ദശലക്ഷം യൂനിറ്റായിരുന്നു ഇന്നലെ രാവിലെ ഏഴിന് അവസാനിച്ച 24 മണിക്കൂറിലെ ഉപഭോഗം. 8.456 ദശലക്ഷം യൂനിറ്റായിരുന്നു ആഭ്യന്തര ഉല്‍പ്പാദനം. ഉപഭോഗം കൂടുന്നതനുസരിച്ച് ഇനി ഉല്‍പാദനം ഉയര്‍ത്തേണ്ടിവരും. 1760.226 ദശലക്ഷം യൂനിറ്റ് വൈദ്യുതി ഉല്‍പ്പാദിപ്പിക്കാനുള്ള വെള്ളമാണ് എല്ലാ അണക്കെട്ടുകളിലുമായി ഉള്ളത്. 2471.311 ദശലക്ഷം യൂനിറ്റിനുള്ള വെള്ളം കഴിഞ്ഞ വര്‍ഷം ഇതേദിവസം ഉണ്ടായിരുന്നു. 711.08 ദശലക്ഷത്തിന്റെ കുറവാണ് ഇക്കുറിയുള്ളത്. സംഭരണികളിലെല്ലാം കൂടി ശേഷിയുടെ 43 ശതമാനം വെള്ളമാണ് അവശേഷിക്കുന്നത്.
വൈദ്യുതി ബോര്‍ഡിന്റെ പ്രധാന അണക്കെട്ടുകളിലെ ഇന്നലത്തെ ജലനിരപ്പ് ശതമാനത്തില്‍ ഇങ്ങനെയാണ്. ഇടുക്കി 35%, ഇടമലയാര്‍ 52% , പമ്പ 48%, ഷോളയാര്‍ 67%, മാട്ടുപ്പെട്ടി 62%, പൊന്മുടി 21%, നേര്യമംഗലം 57%, ലോവര്‍പെരിയാര്‍ 68%, കുറ്റ്യാടി 45%, കുണ്ടള 66%, ആനയിറങ്കല്‍ 34%. ഇടുക്കി 2.386 ദശലക്ഷം യൂനിറ്റ്, ശബരിഗിരി 1.2465, ഇടമലയാര്‍ 0.9101, ഷോളയാര്‍ 0.5976, പള്ളിവാസല്‍ 0.297, കുറ്റ്യാടി 1.732, നേര്യമംഗലം 0.1109, പൊരിങ്ങല്‍കുത്ത് 0.328 എന്നിങ്ങനെയായിരുന്നു വൈദ്യുതി ബോര്‍ഡിന്റെ പ്രധാന പദ്ധതികളില്‍ നിന്നുള്ള ഇന്നലത്തെ ഉല്‍പാദനം.