ബി.പി ഒന്ന് അളക്കണം. ഡോക്ടറുടെ അടുത്ത് പോയാല്‍ തിടുക്കത്തില്‍ പരിശോധിച്ച് രേഖപ്പെടുത്തുന്ന രക്തസമ്മര്‍ദം കൊണ്ട് രോഗനിര്‍ണയം കൃത്യമായിക്കൊള്ളണമെന്നില്ല. നിങ്ങളുടെ ആ സമയത്തെ ബി.പി മാത്രമാണ് അതില്‍ രേഖപ്പെടുത്തുന്നത്. 24 മണിക്കൂറും നിങ്ങളെ നിരീക്ഷിച്ച് ബി.പി രേഖപ്പെടുത്താനുള്ള ഉപകരണമാണ് ആംബുലേറ്ററി ബ്ലഡ് പ്രഷര്‍ മോണിറ്ററിങ്.

സമയം സെറ്റ് ചെയ്തുവച്ചാല്‍ ബി.പി രേഖപ്പെടുത്താന്‍ തുടങ്ങിക്കോളും. അതാതു സമയത്ത് കാണിച്ചു തരാന്‍ ചെറിയൊരു ഡിജിറ്റല്‍ മോണിറ്ററുമുണ്ട്. കയ്യില്‍ ചുറ്റുന്ന ആം കഫുമായി റബ്ബര്‍ ട്യൂബില്‍ ബന്ധിപ്പിച്ചാണ് മോണിറ്ററുള്ളത്.
രാത്രി ഉറങ്ങുമ്പോഴുള്ള ബി.പിയും ഉപകരണം രേഖപ്പെടുത്തുമെന്നതാണ് പ്രത്യേകത. അരയില്‍ ബെല്‍റ്റിനൊപ്പം ഘടിപ്പിക്കാവുന്ന ഉപകരണമാണിത്. ഇതു കെട്ടിയാല്‍ ജോലികളില്‍ വ്യാപൃതനാവുന്നതിനും കുഴപ്പമില്ല. ഉറങ്ങുമ്പോഴും ശല്യം ചെയ്യില്ല. 24 മണിക്കൂര്‍ നേരത്തെ പരിശോധനയ്ക്കു ശേഷം അഴിച്ചുവച്ചാല്‍ ഓരോ 20 മിനിറ്റിലും രേഖപ്പെടുത്തിയ ബി.പിയുടെ ചാര്‍ട്ട് ലഭിക്കും.
ഡിപ്പേഴ്‌സ്, നോണ്‍ഡിപ്പേഴ്‌സ്, റിവേഴ്‌സ് ഡിപ്പേഴ്‌സ് തുടങ്ങിയ വിഭാഗത്തില്‍പ്പെട്ടവരില്‍ കൃത്യമായി രോഗനിര്‍ണയം നടത്താന്‍ ഈ ചാര്‍ട്ട് സഹായിക്കും.
ഹൃദയാഘാതം, സ്‌ട്രോക്ക്, ഹൃദയസ്തംഭനം തുടങ്ങിയ രോഗ സാധ്യതകള്‍ കൃത്യമായി അറിയാന്‍ വിവിധ സമയത്തുള്ള ചാര്‍ട്ടുകള്‍ ഉപകരിക്കും.
ഉണരുന്നതിനു മുമ്പുള്ള രക്തസമ്മര്‍ദം, ഉറങ്ങുമ്പോഴുള്ള രക്തസമ്മര്‍ദം, ഉണര്‍ന്നു കഴിഞ്ഞ ശേഷമുള്ള രക്തസമ്മര്‍ദം എന്നിവയുടെ അളവുകള്‍ നോക്കിയാണ് ഈ രോഗ സാധ്യത പെട്ടെന്നു കണ്ടെത്താനാവുക.