തൃശൂര്‍: കാര്‍ട്ടൂണുകളോടൊപ്പം ട്രോളുകള്‍ ഏറെ ചര്‍ച്ച ചെയ്യപ്പെടുന്ന കാലം. ട്രോളിന്റെ പ്രവാഹത്തില്‍ കാര്‍ട്ടൂണുകള്‍ക്ക് ഇടമുണ്ടോയെന്ന ചൂടന്‍ ചര്‍ച്ചയും സാഹിത്യലോകത്ത് നടക്കുന്നു. എന്നാല്‍ ഈ ചര്‍ച്ചയൊന്നും ശദാബ് അഹമ്മദ് സി.എല്‍ എന്ന കുഞ്ഞു കാര്‍ട്ടൂണിസ്റ്റിന് ഒരു പ്രശ്‌നമേയല്ല.

സംസ്ഥാന സ്‌കൂള്‍ കലോത്സവത്തില്‍ ഹൈസ്‌കൂള്‍ വിഭാഗം കാര്‍ട്ടൂണ്‍ മത്സരത്തില്‍ എ ഗ്രേഡ് നേടിയ ശദാബ് അറിയപ്പെട്ട ട്രോളന്‍ കൂടിയാണ്. ട്രോള്‍ കെ.എല്‍ 14 പോലുള്ള ഫേസ്ബുക്ക് ഗ്രൂപ്പുകളില്‍ 'കെ കണക്കിനു ലൈക്കു'കള്‍ വാരിക്കൂട്ടുന്ന ശദാബിന് കാര്‍ട്ടൂണ്‍ വിട്ടും കളിയില്ല. കാര്‍ട്ടൂണിനോടുള്ള ഇഷ്ടവും താല്‍പര്യവും എന്നും കൊണ്ടുനടക്കുന്ന ശദാബ് കൊച്ചുപ്രായത്തിലേ നിരവധി എക്‌സിബിഷനുകളും നടത്തിയിട്ടുണ്ട്. കാസര്‍കോട് പരവനടുക്കം ജി.എച്ച്.എസ്.എസ് ഒന്‍പതാം ക്ലാസ് വിദ്യാര്‍ഥിയായ ശദാബ് , ശരീഫ്-സീയസ്മിന്‍ ദമ്പതികളുടെ മകനാണ്.
അഞ്ചാം ക്ലാസ് മുതല്‍ കാര്‍ട്ടൂണുകള്‍ വരയ്ക്കുന്നുണ്ടെങ്കിലും ഇതാദ്യമായാണ് സംസ്ഥാന സ്‌കൂള്‍ കലോത്സവത്തില്‍ മത്സരിക്കാനെത്തുന്നത്. ഇരുപത് പേരുണ്ടായിരുന്ന കാര്‍ട്ടൂണ്‍ മത്സരത്തില്‍ ശദാബിനും മറ്റു രണ്ടു പേര്‍ക്കും മാത്രമാണ് എ ഗ്രേഡ് ലഭിച്ചത്. കാര്‍ട്ടൂണിനു പുറമെ, വരയിലും, ഡിജിറ്റല്‍ പെയിന്റിങിലും മിമിക്രിയിലും ശദാബ് മികച്ച പ്രകടനം നടത്തുന്നുണ്ട്. മിമിക്രി ചെയ്യുന്നതോടൊപ്പം കാര്‍ട്ടൂണ്‍ കൂടി വരയ്ക്കുന്ന 'മിമിക്ടൂണ്‍' എന്ന പുതിയ വീഡിയോ പരിപാടി ചെയ്യാനുള്ള തയാറെടുപ്പിലാണ് ശദാബ് ഇപ്പോള്‍.