കൊണ്ടോട്ടി: സമസ്ത ജന. സെക്രട്ടറിയും കൊണ്ടോട്ടി ഖാസിയാരകം മഹല്ല് ഖാസിയുമായിരുന്ന സൈനുല്‍ ഉലമാ ചെറുശ്ശേരി സൈനുദ്ദീന്‍ മുസ്‌ലിയാരുടെ ഒന്നാം ഉറൂസും മഹല്ല് ഖാസിയായി പാണക്കാട് സയ്യിദ് ഹൈദരലി ശിഹാബ് തങ്ങളുടെ സ്ഥാനാരോഹണവും ഇന്ന് ഖാസിയാരകം മദ്‌റസ അങ്കണത്തില്‍ നടക്കുമെന്ന് ഭാരവാഹികള്‍ അറിയിച്ചു. തുറക്കല്‍, മുണ്ടപ്പലം, വട്ടപ്പറമ്പ് മഹല്ല് മേല്‍ഖാസി സ്ഥാനാരോഹണവും ചടങ്ങില്‍ നടക്കും.
1968 മുതല്‍ 2016 മരണം വരെ ഖാസിയാരകം ജുമുഅത്ത് പള്ളിയുടെ മഹല്ല് ഖാസിയായിരുന്നു ചെറുശ്ശേരി സൈനുദ്ദീന്‍ മുസ്‌ലിയാര്‍. രാവിലെ 8.30ന് സൈനുല്‍ ഉലമയുടെ മഖാം സിയാറത്തോടെയാണ് പരിപാടികള്‍ക്ക് തുടക്കമാവുക.
വൈകിട്ട് അഞ്ചിന് കോഴിക്കോട് ഖാസി നാസര്‍ ഹയ്യ് ശിഹാബ് തങ്ങള്‍ ഖത്മുല്‍ ഖുര്‍ആനിന് നേതൃത്വം നല്‍കും. വൈകിട്ട് 6.30നുളള പൊതുസമ്മേളനം സസ്ത പ്രസിഡന്റ് സയ്യിദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. മഹല്ല് പ്രസിഡന്റ് സി.പി കുഞ്ഞാന്‍ അധ്യക്ഷനാകും.
പാണക്കാട് സയ്യിദ് ഹൈദരലി ശിഹാബ് തങ്ങള്‍ അനുഗ്രഹ പ്രഭാഷണം നടത്തും. എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ മുഖ്യപ്രഭാഷണം നടത്തും.
സമസ്ത ജനറല്‍ സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സാദിഖ് മുസ്‌ലിയാര്‍, സെക്രട്ടറി എം.ടി അബ്ദുല്ല മുസ്‌ലിയാര്‍, കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ഡോ. ബഹാഉദ്ദീന്‍ മുഹമ്മദ് നദ്‌വി, ഷാജഹാന്‍ റഹ്മാനി കംബ്ലക്കാട്, എസ്.കെ.പി.എം തങ്ങള്‍, കെ.സി മുഹമ്മദ് ബാഖവി സംസാരിക്കും.
വാവാട് കുഞ്ഞിക്കോയ മുസ്‌ലിയാര്‍ ദിക്ര്‍ ദുആ സംഗമത്തിന് നേതൃത്വം നല്‍കും. വാര്‍ത്താ സമ്മേളനത്തില്‍ സി.പി കുഞ്ഞാന്‍, പി കുഞ്ഞിമുഹമ്മദ്, എസ്.കെ.പി.എം തങ്ങള്‍, എം അഹമ്മദ് കുട്ടി മാസ്റ്റര്‍, അവറാന്‍, റഫീഖ് ചെറുശ്ശേരി, ഫാറൂഖ് കരിപ്പൂര്‍ സംബന്ധിച്ചു.