മലപ്പുറം: കേരള പ്രദേഴ്‌സ് സ്‌കൂള്‍ ടീച്ചേഴ്‌സ് അസോസിയേഷന്‍(കെ.പി.എസ്.ടി.എ) പ്രഥമ സംസ്ഥാന സമ്മേളനം എട്ടു മുതല്‍ 11വരെ മലപ്പുറത്ത് നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ പറഞ്ഞു. സര്‍ക്കാര്‍, എയ്ഡഡ് മേഖലകളില്‍ പ്രവര്‍ത്തിച്ച്‌കൊണ്ടിരുന്ന കെ.പി.എസ്.ടി.യു, ജി.എസ്.ടി.യു എന്നീ അധ്യാപക സംഘടനകള്‍ ലയിച്ചുണ്ടായ സംഘടനയാണ് കെ.പി.എസ്.ടി.എ. കഴിഞ്ഞ വര്‍ഷം നിലവില്‍ വന്ന സംഘടനയുടെ പ്രഥമ സമ്മേളനമാണ് മലപ്പുറത്ത് നടക്കുന്നത്. എട്ടിന് രാവിലെ 11ന് കെ.പി.എസ്.ടി.എ ഭവനില്‍ നടക്കുന്ന വിദ്യാഭ്യാസ സെമിനാറോട് കൂടി സമ്മേളനം ആരംഭിക്കു. തുടര്‍ന്ന് സ്മൃതി സദസ്സ്, സംസ്ഥാന സെക്രട്ടറിയോറ്റ് യോഗം എന്നിവനടക്കും.
ഒന്‍പതിന് മലപ്പുറം ടൗണ്‍ഹാളില്‍ സമ്മേളനത്തിന്റെ ഔദ്യോഗിക ഉദ്ഘാടനം പ്രതിപക്ഷ നേതാവ് രമേശ് ചെന്നിത്തല നിര്‍വഹിക്കും. ഉച്ചയ്ക്ക് 12.30ന് നടക്കുന്ന വിദ്യാഭ്യാസ സമ്മേളനം വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ് ഉദ്ഘാടനം ചെയ്യും. വൈകിട്ട് 3.30ന് ടൗണ്‍ഹാള്‍ പരിസരത്തും നിന്നും അധ്യാപക പ്രകടനം ആരംഭിക്കും. തുടര്‍ന്ന നടക്കുന്ന പൊതുസമ്മേളനം മുന്‍മുഖ്യമന്ത്രി ഉമ്മന്‍ചാണ്ടി ഉദ്ഘാടനം ചെയ്യും.
വാര്‍ത്താസമ്മേളനത്തില്‍ സ്വാഗതസംഘം വൈസ് ചെയര്‍മാന്‍ വീക്ഷണം മുഹമ്മദ്, സംസ്ഥാന പ്രസിഡന്റ് പി ഹരിഗോവിന്ദന്‍, ജനറല്‍ സെക്രട്ടറി എം സലാഹുദ്ദീന്‍, വൈസ് പ്രസിഡന്റുമാരായ ജോര്‍ജ് കൊളത്തൂര്‍, വി.കെ അജിത്കുമാര്‍, സെക്രട്ടറി എം.കെ സനല്‍കുമാര്‍, ജില്ലാ പ്രസിഡന്റ് കെ അബ്ദുല്‍മജീദ്, സെക്രട്ടറി റോയിതോമസ്, മീഡിയ കണ്‍വീനര്‍ ഒ.പി.കെ അബ്ദുല്‍ഗഫൂര്‍ പങ്കെടുത്തു.