വെള്ളറട: കുഴല്‍പ്പണ ലോബിയെ പാറശ്ശാല സി.ഐയുടെ നേതൃത്വത്തിലുള്ള സംഘം പിടികൂടി. കോഴിക്കോട് കൊടുവള്ളി കുന്നത്തു വീട്ടില്‍ മുഹമ്മദ് ഇല്ല്യാസ് (22), കോഴിക്കോട് കൊടുവള്ളി പൊട്ടമ്മല്‍ വീട്ടില്‍ നിഷാദ് (23), വയനാട് മൊട്ടയില്‍ മെത്രാന്‍ ചിറയില്‍ വീട്ടില്‍ സജീവ് (33) എന്നിവരാണ് പിടിയിലായത്. ആര്യന്‍കോട് പൊലിസ് പരിധിയില്‍ വന്‍ തോതില്‍ കുഴല്‍പ്പണ ഇടപാട് നടക്കുന്നുണ്ടെന്ന് നെയ്യാറ്റിന്‍കര ഡി.വൈ.എസ്.പി ഹരികുമാറിന് രഹസ്യവിവരം ലഭിച്ചിരുന്നു.
പാറശ്ശാല സി.ഐ സന്തോഷ്‌കുമാറിന്റെ നേതൃത്വത്തിലുള്ള സംഘത്തെ കണ്ട ലോബി ബൈക്ക് തിരിച്ച് രക്ഷപ്പെടാന്‍ ശ്രമിക്കുകയായിരുന്നു. ജീപ്പില്‍ പിന്തുടര്‍ന്നാണ് മുഹമ്മദ് ഇല്ല്യാസിനെ പിടികൂടിയത്. ബൈക്കില്‍ സൂക്ഷിച്ച 12, 23,000 രൂപ പിടികൂടി. സി.ഐ സന്തോഷ്‌കുമാറിന്റെ വിശദമായ ചോദ്യം ചെയ്യലില്‍ രണ്ടംഗസംഘം തിരുവനന്തപുരത്ത് ഫഌറ്റ് വാടകയ്‌ക്കെടുത്തു തങ്ങുന്നതായി വിവരം ലഭിച്ചു. ഫഌറ്റിലെത്തിയാണ് നിഷാദിനെയും സജീവിനെയും പിടികൂടിയത്. പ്രതികളെ റിമാന്റ് ചെയ്തു.