കോഴിക്കോട്: മനുഷ്യദുരിതങ്ങള്‍ ദേശീയതയുടെ പേരില്‍ ന്യായീകരിപ്പക്കെടുമ്പോള്‍ ദേശീയത ചോദ്യംചെയ്യപ്പെടുന്ന ആശയമാണെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍.

ഫാസിസം ഉയര്‍ത്തുന്ന കോണ്‍ഗ്രസ് മുക്ത ഭാരതത്തോടും, മറു വിഭാഗം ഉയര്‍ത്തുന്ന സംഘ് വിരുദ്ധ ആശയത്തോടും ഞാന്‍
വിയോജിക്കുന്നുണ്ട്.

സംഘപരിവാറുകാരും കോണ്‍ഗ്രസും ഇടതുപക്ഷവും മാവോയിസ്റ്റും കൂടിച്ചേര്‍ന്ന മഴവില്‍ ജനാധിപത്യത്തെ കുറിച്ചാണ് ഞാന്‍
സങ്കല്‍പിക്കുന്നത്. ഇന്ത്യന്‍ ദേശീയത ജനങ്ങളുടെ ഐക്യമാണ്.

ദേശനിര്‍മിതിയും ദേശീയതയും ബന്ധപ്പെട്ട് കിടക്കുന്നുണ്ട്. ഇന്ത്യയില്‍ സ്വാതന്ത്ര്യാനന്തരം ദേശീയതയ്ക്ക് പുതിയ നിര്‍വചനം നല്‍കാന്‍
സാധിക്കാത്തതാണ് രാജ്യ പുരോഗതിക്ക് തടസമായത്.

എന്നാല്‍ ഇതിന്റെ ഫലം ന്യൂനപക്ഷം വരുന്ന ജനങ്ങള്‍ അനുഭവിക്കുന്നുണ്ട്. സാഹിത്യോത്സവത്തില്‍ ദേശീയതയുടെ നിര്‍വചനങ്ങള്‍ എന്ന വിഷയത്തില്‍ നടത്തിയ ചര്‍ച്ചയില്‍ സംസാരിക്കുകയായിരുന്നു അദ്ദേഹം. സി.ആര്‍ നീലകണ്ഠന്‍, കെ.ഇ.എന്‍ കുഞ്ഞഹമ്മദ്, സിവിക് ചന്ദ്രന്‍ എന്നിവര്‍ പങ്കെടുത്തു.

ദേശീയ ഗാനവും ദേശീയ പതാകയും ദേശീയതയുടെ പൊരുളല്ല പ്രതീകങ്ങളാണെന്ന് കെ.ഇ.എന്‍ അഭിപ്രായപ്പെട്ടു. കരി നിയമങ്ങളും അധികാര ദുര്‍വിനിയോഗവും കപടദേശീയതയും വിഷയങ്ങളായ വേദിയില്‍ യഥാര്‍ത്ഥ ഭാരതീയ ദേശീയത തടവറയിലാക്കപ്പെട്ടിരിക്കുകയാണെന്ന് പൊതുവായി ഉയര്‍ന്നുവന്നു.

ദേശീയത ഏകശിലാരൂപമല്ലെന്നും ഭരണഘടനയിലെ വൈവിധ്യങ്ങളെ ഉള്‍ക്കൊള്ളാനും അംഗീകരിക്കാനും കഴിയാത്ത ദേശീയത ഇന്ത്യന്‍ ദേശീയതയല്ലെന്നും സി.ആര്‍ നീലകണ്ഠന്‍ അഭിപ്രായപ്പെട്ടു.

ദേശീയതയുടെ നിലനില്‍പ്പിന് ഒരു ശത്രുവിനെ ആവശ്യമാണ്. സ്വാതന്ത്ര്യ പൂര്‍വ്വകാലഘട്ടത്തില്‍ അത് ബ്രിട്ടീഷുകാര്‍ ആയിരുന്നെങ്കില്‍ ഇന്ന് വളര്‍ന്നുവന്ന ഹിന്ദുമത ബോധത്തിലധിഷ്ടിതമായ ദേശീയതയുടെ ശത്രുക്കള്‍ ദളിതരും മുസ്ലീംങ്ങളുമാണെന്നും സിവിക് ചന്ദ്രന്‍ അഭിപ്രായപ്പെട്ടു. എ.കെ അബ്ദുള്‍ ഹക്കീം മോഡറേറ്ററായി.