കൊച്ചി: പാറ്റൂര്‍ ഭൂമിക്കേസില്‍ മുന്‍ വിജിലന്‍സ് ഡയറക്ടര്‍ ജേക്കബ് തോമസ് വിശദീകരണ റിപ്പോര്‍ട്ട് നല്‍കാത്തത് നിര്‍ഭാഗ്യകരമാണെന്ന് ഹൈക്കോടതി. കോടതി നേരിട്ട് ആവശ്യപ്പെട്ടിട്ടും റിപ്പോര്‍ട്ട് നല്‍കാനോ സര്‍ക്കാര്‍ അഭിഭാഷകനുമായി ചര്‍ച്ച ചെയ്യാനോ ജേക്കബ് തോമസ് തയാറാകാത്തത് ശരിയല്ലെന്നും നടപടിയില്‍ അതൃപ്തിയുണ്ടെന്നും ഹൈക്കോടതി വ്യക്തമാക്കി. കേസില്‍ വാദം പൂര്‍ത്തിയായെങ്കിലും സംഭവങ്ങളുടെ ക്രമപ്പട്ടിക ഹാജരാക്കാന്‍ നിര്‍ദേശിച്ച ഹൈക്കോടതി ഹരജി ജനുവരി 19 ലേക്ക് മാറ്റി.
പാറ്റൂരില്‍ സ്വകാര്യ ബില്‍ഡറെ സഹായിക്കാന്‍ വാട്ടര്‍ അതോറിറ്റിയുടെ സ്വീവേജ് പൈപ്പ് ലൈന്‍ മാറ്റി സ്ഥാപിച്ചതുവഴി 12.75 സെന്റ് സര്‍ക്കാര്‍ ഭൂമി നഷ്ടമായെന്നാണ് കേസ്. ഭൂമിയുടെ സെറ്റില്‍മെന്റ് രജിസ്റ്ററില്‍ ക്രമക്കേടുണ്ടെന്ന് ലോകായുക്തയില്‍ ജേക്കബ് തോമസ് സമര്‍പ്പിച്ച റിപ്പോര്‍ട്ടില്‍ പറഞ്ഞിരുന്നു. ഇക്കാര്യം ഹൈക്കോടതിയിലെ ഹരജിയില്‍ ചര്‍ച്ചയായപ്പോള്‍ ജേക്കബ് തോമസിനോട് ഹാജരായി വിശദീകരണം നല്‍കാന്‍ നിര്‍ദേശിച്ചു. ഇതനുസരിച്ച് ഡിസംബര്‍ 18ന് ജേക്കബ് തോമസ് ഹാജരായി. ലോകായുക്തക്ക് നല്‍കിയ റിപ്പോര്‍ട്ടില്‍ തെറ്റുണ്ടെങ്കില്‍ അക്കാര്യം പറയണമെന്നും ഇക്കാര്യം വ്യക്തമാക്കി സര്‍ക്കാര്‍ അഭിഭാഷകന്‍ മുഖേന റിപ്പോര്‍ട്ട് നല്‍കണമെന്നും ഹൈക്കോടതി നിര്‍ദേശിച്ചു. എന്നാല്‍ ജേക്കബ് തോമസ് റിപ്പോര്‍ട്ട് നല്‍കിയില്ല. തുടര്‍ന്നാണ് ഹൈക്കോടതി രേഖാമൂലം അതൃപ്തി അറിയിച്ചത്. മുന്‍ ചീഫ് സെക്രട്ടറി ഇ.കെ ഭരത് ഭൂഷണ്‍ നല്‍കിയ ഹരജിയാണ് ഹൈക്കോടതി പരിഗണിക്കുന്നത്.