പെരുമ്പാവൂര്‍: പെരുമ്പാവൂരില്‍ മൂന്നിടങ്ങളിലായി പറമ്പുകള്‍ക്ക് തീപിടിച്ചു. പൂപ്പാനി കാരാട്ടുപള്ളിക്കരയില്‍ വെട്ടിനാക്കുടി വീട്ടില്‍ വര്‍ഗ്ഗീസിന്റെ ഉടമസ്ഥതയിലുള്ള ഒന്നര ഏക്കര്‍ സ്ഥലത്ത് തിപിടര്‍ന്നതിനെ തുടര്‍ന്ന് ഫയര്‍ ഫോഴ്‌സെത്തി തീയണച്ചു. ഇന്നലെ ഉച്ചയ്ക്ക് ഒരു മണിയോടെയാണ് സംഭവം. പറമ്പിന് സമീപത്ത് കൂട്ടിയിട്ടിരുന്ന കരീലകള്‍ക്ക് കത്തിച്ചതാണ് അപകടത്തിന് കാരണമായത്.
പെരുമ്പാവൂര്‍ ബോയ്‌സ് സ്‌കൂളിന് സമീപം 30 സെന്റോളം വരുന്ന സ്ഥലത്ത് തീപിടിച്ചതാണ് മറ്റൊരു സംഭവം. ഇന്നലെ ഉച്ചയ്ക്ക് 2.40 ഓടെയാണ് സംഭവം.
സ്‌കൂളിലെ നടന്ന പരിപാടിയുടെ ഭാഗമായുള്ള ഭക്ഷണ വേസ്റ്റുകള്‍ കത്തിച്ചതില്‍ നിന്നും തീപടര്‍ന്നാണ് അപകടമെന്ന് ഫയര്‍ ഫോഴ്‌സ് പറഞ്ഞു.
കെ.എസ്.ആര്‍.ടി.സി മരുത് കവലയിലും തീപിടുത്തമുണ്ടായി. ഇന്നലെ ഉച്ചയ്ക്ക് 2.45 ഓടെയാണ് സംഭവം. കല്യാണ ഭക്ഷണത്തിന്റെ വേസ്റ്റ് കത്തിച്ചതില്‍ നിന്നും തീപടര്‍ന്നതാണ് അപകടത്തിന് കാരണം. മൂന്നിടത്തും ആളപായമോ കാര്യമായ നാശനഷ്ടങ്ങളോ സംഭവിച്ചിട്ടില്ല.