ചെറുവത്തൂര്‍: കുട്ടികളെ പഠന മികവിലേക്കു കൈപിടിച്ചുയര്‍ത്താന്‍ അവധിദിനങ്ങളിലും ജോലി ചെയ്ത് അധ്യാപകര്‍. മുഴുവന്‍ കുട്ടികളിലും മാതൃഭാഷാ ശേഷി ഉറപ്പാക്കുന്നതിനാണു ഫെബ്രുവരി മാസത്തില്‍ 30 മണിക്കൂര്‍ അധിക സമയം അധ്യാപകര്‍ ജോലി ചെയ്യുന്നത്. സാധാരണ പ്രവൃത്തി ദിവസങ്ങളിലെ നിശ്ചിത പഠന മണിക്കൂറുകള്‍ക്കു പുറമെ ഈ മാസത്തില്‍ ശനിയാഴ്ചകള്‍ ഉള്‍പ്പെടെ പ്രയോജനപ്പെടുത്തിയാണ് 30 മണിക്കൂര്‍ അധികസമയം കണ്ടെത്തുന്നത്.
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സര്‍വശിക്ഷ അഭിയാന്‍ സംഘടിപ്പിച്ച 'മലയാളത്തിളക്കത്തിനായാണ്' അവധിദിനങ്ങളിലും അധ്യാപകര്‍ വിദ്യാലയങ്ങളില്‍ എത്തുന്നത്.
മലയാളത്തില്‍ എഴുത്ത്, വായന എന്നിവയില്‍ പ്രയാസം നേരിടുന്ന കുട്ടികള്‍ ഉണ്ടെങ്കില്‍ വ്യക്തിഗത ശ്രദ്ധനല്‍കി അവരെ കൂടി മുന്നിലേക്ക് എത്തിക്കുവാനാണ് ലക്ഷ്യം. പദ്ധതിയുടെ ജില്ല, മണ്ഡലം, പഞ്ചായത്ത്തല പിശീലനങ്ങള്‍ക്കു ശേഷം തിരഞ്ഞെടുക്കപ്പെട്ട വിദ്യാലയങ്ങളില്‍ 10 മണിക്കൂര്‍ ട്രൈ ഔട്ട് ക്ലാസുകള്‍ നടത്തിയിരുന്നു.
പരിശീലനം ലഭിച്ച ഓരോ അധ്യാപകരും സ്വന്തം വിദ്യാലയത്തില്‍ ഇനിയുള്ള ദിവസങ്ങളില്‍ പരിശീലനത്തിനു നേതൃത്വം നല്‍കും. പ്രൈമറി വിഭാഗത്തിലെ മുഴുവന്‍ അധ്യാപകരും അധിക സമയ ക്ലാസുകള്‍ക്ക് നേതൃത്വം നല്‍കാനുണ്ടാകും. ഭാഷാപരമായ മികവു തെളിയിക്കാന്‍ എല്ലാ വിഭാഗം കുട്ടികള്‍ക്കും അവസരം നല്‍കുന്ന വൈവിധ്യമാര്‍ന്ന ഒട്ടേറെ പഠനപ്രവര്‍ത്തനങ്ങളടങ്ങിയതാണ് 30 മണിക്കൂര്‍ കൊണ്ട് പൂര്‍ത്തിയാക്കാന്‍ ലക്ഷ്യമിടുന്ന മലയാളത്തിളക്കം പദ്ധതി. ഇതിനായി പ്രത്യേക കൈപ്പുസ്തകവും തയാറാക്കിയിട്ടുണ്ട്. അധ്യാപകരുടെ സേവനത്തിന് പിന്തുണയുമായി രക്ഷിതാക്കളും വിദ്യാലയങ്ങളിലുണ്ട്.