ചെന്നൈ: ശശികല മുഖ്യമന്ത്രി പദമേറ്റെടുക്കുമ്പോള്‍ മുഖ്യമന്ത്രിയായിരുന്ന പനീര്‍ ശെല്‍വം ഏത് പദവിയില്‍ തുടരുമെന്നത് തമിഴകത്ത് ഉയരുന്ന മുഖ്യമായ ചോദ്യമാണ്. ജയലളിത മുഖ്യമന്ത്രിയായിരുന്നപ്പോള്‍ മന്ത്രി സഭയിലെ രണ്ടാമനായി കഴിഞ്ഞ അദ്ദേഹത്തെ അവര്‍ ധനമന്ത്രിയായി നിയമിച്ചു. അനധികൃത സ്വത്ത് സമ്പാദനക്കേസുമായി ബന്ധപ്പെട്ട് മുഖ്യമന്ത്രി സ്ഥാനത്തു നിന്നും ജയലളിത മാറി നിന്നപ്പോഴും അസുഖബാധിതയായി ആശുപത്രിയില്‍ കഴിഞ്ഞപ്പോഴും മുഖ്യമന്ത്രിയായും ഭരണം നിയന്ത്രിച്ചു.
മുഖ്യമന്ത്രി പദത്തില്‍ നിന്നും ഒഴിഞ്ഞാലും അദ്ദേഹത്തെ ധനമന്ത്രിയായി ശശികല നിലനിര്‍ത്തുമെന്നാണ് വിവരം. ഇക്കാര്യത്തില്‍ പനീര്‍ ശെല്‍വം എന്ത് നിലപാട് സ്വീകരിക്കുമെന്ന കാര്യത്തില്‍ അദ്ദേഹം ഇതുവരെ നിലപാട് വ്യക്തമാക്കിയിട്ടില്ല.
പാര്‍ട്ടിയിലെ പ്രബലമായ വിഭാഗം ശശികല മുഖ്യമന്ത്രി പദം ഏറ്റെടുക്കണമെന്ന് നേരത്തെതന്നെ ആവശ്യപ്പെട്ടിരുന്നു. പാര്‍ട്ടിയുടെ സംഘടനാ തലം ശക്തിപ്പെടുത്തുന്നതിന്റെ ഭാഗമായി മുതിര്‍ന്ന നേതാക്കളടക്കം 23പേരെ കഴിഞ്ഞ വെള്ളിയാഴ്ച ശശികല ഭാരവാഹികളായി നിയമിച്ചിരുന്നു.
കഴിഞ്ഞ ഡിസംബര്‍ അഞ്ചിനാണ് ജയലളിത അന്തരിച്ചത്. തുടര്‍ന്ന് 31ന് ശശികലയെ പാര്‍ട്ടി ജന.സെക്രട്ടറിയായി തെരഞ്ഞെടുത്തു. 62 കാരിയായ ശശികല ജയലളിതയുടെ നിഴലായിരുന്നു.
അതേസമയം കാലതാമസം വരുത്താതെ മുഖ്യമന്ത്രി പദം എത്രയും പെട്ടെന്ന് ഏറ്റെടുക്കാന്‍ ശശികലയെ പ്രേരിപ്പിച്ചത് ഭര്‍ത്താവ് നടരാജനും കൂട്ടരുമാണെന്നാണ് വിവരം. ജല്ലിക്കെട്ട് വിഷയം കൈകാര്യം ചെയ്തതിലെ തന്ത്രങ്ങളും അന്തര്‍ സംസ്ഥാന നദീജലത്തര്‍ക്കത്തില്‍ സ്വീകരിക്കുന്ന രാഷ്ട്രീയ തന്ത്രങ്ങളും പനീര്‍ശെല്‍വത്തിന്റെ സ്വീകാര്യത വര്‍ധിപ്പിക്കുന്നുണ്ടെന്ന തിരിച്ചറിവ് മന്നാര്‍ഗുഡി മാഫിയയെ അസ്വസ്ഥമാക്കിയിരുന്നു.
പനീര്‍ശെവല്‍വത്തിനുള്ള ജനകീയ പിന്‍തുണ വര്‍ധിച്ചാല്‍ മുഖ്യമന്ത്രി പദത്തിലേക്കുള്ള ശശികലയുടെ നീക്കം എളുപ്പമാവില്ലെന്നും ഇവര്‍ മുന്നറിയിപ്പു നല്‍കി.
പനീര്‍ശെല്‍വം ജനങ്ങളിലേക്ക് ഇറങ്ങിച്ചെല്ലുന്ന നേതാവാണ്. ഇതിനിടയില്‍ ജയലളിതയുടെ സഹോദരന്റെ മകള്‍ ദീപ ജയകുമാര്‍ ഈ മാസം 24ന് രാഷ്ട്രീയ നയം വ്യക്തമാക്കാനിരിക്കുകയാണ്. ഈ വെല്ലുവിളിയും മുന്നില്‍ കണ്ടാണ് ശശികല തിരക്കിട്ട് മുഖ്യമന്ത്രി പദത്തിലേക്ക് വരുന്നത്.