കൊച്ചി: സീറോ മലബാര്‍ സഭയുടെ എറണാകുളം അങ്കമാലി അതിരൂപതയിലെ ഭൂമി ഇടപാടുകള്‍ സംബന്ധിച്ച പ്രശ്‌നങ്ങളില്‍ സിനഡ് നിയോഗിച്ച അഞ്ചംഗ കമ്മിറ്റി തെളിവെടുപ്പ് തുടങ്ങി. വിവാദ വിഷയങ്ങളില്‍ രമ്യമായ പരിഹാരം കാണാന്‍ വൈദിക സമതി അംഗങ്ങള്‍ ധാരണയിലെത്തി. പ്രശ്‌നങ്ങളെക്കുറിച്ചു പഠിക്കാന്‍ വൈദിക സമിതി നിര്‍ദേശിച്ച അന്വേഷണ കമ്മിറ്റിയുടെ അന്തിമറിപ്പോര്‍ട്ടിന്റെ പശ്ചാത്തലത്തില്‍ വൈദിക സമിതി അംഗങ്ങളുടെ അഭിപ്രായങ്ങള്‍ മെത്രാന്മാര്‍ ചോദിച്ചറിഞ്ഞു. ഇതിന്റെ അടിസ്ഥാനത്തില്‍ സിനഡിനു റിപ്പോര്‍ട്ട് സമര്‍പ്പിക്കും. ഉചിതവും ക്രിയാത്മകവുമായ നടപടികള്‍ ഉടനുണ്ടാവുമെന്നു കമ്മിറ്റി കണ്‍വീനര്‍ ആര്‍ച്ച് ബിഷപ് മാര്‍ മാത്യു മൂലക്കാട്ട് പറഞ്ഞു. മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി, സഹായമെത്രാന്മാരായ മാര്‍ സെബാസ്റ്റ്യന്‍ എടയന്ത്രത്ത്, മാര്‍ ജോസ് പുത്തന്‍വീട്ടില്‍ എന്നിവര്‍ വൈദിക സമിതി അംഗങ്ങളുമായി കൂടിക്കാഴ്ച നടത്തി.
അന്വേഷണ റിപ്പോര്‍ട്ട് പ്രശ്‌നങ്ങളിലേക്ക് വെളിച്ചം വീശാന്‍ സഹായിച്ചെന്ന് മേജര്‍ ആര്‍ച്ച് ബിഷപ് പറഞ്ഞു. കമ്മിറ്റിയുടെ റിപ്പോര്‍ട്ടിന്റെ വെളിച്ചത്തില്‍ ഉചിതമായ നടപടികള്‍ സ്വീകരിക്കുമെന്നും കര്‍ദിനാള്‍ അറിയിച്ചു.