ന്യൂഡല്‍ഹി: വേള്‍ഡ് സീരീസ് ഓഫ് ബോക്‌സിങ് പോരാട്ടത്തില്‍ ഇന്ത്യയുടെ ആദ്യ മത്സരം റഷ്യയുമായി. ഫെബ്രുവരി ആദ്യം ആരംഭിക്കുന്ന പരമ്പരയില്‍ ഇന്ത്യന്‍ ടൈഗേഴ്‌സ് എന്ന പേരിലാണ് ഇന്ത്യ മത്സരിക്കാനിറങ്ങുന്നത്. അന്താരാഷ്ട്ര ബോക്‌സിങ് അസോസിയേഷന്‍ അംഗീകാരമുള്ള ബോക്‌സിങ് പരമ്പരയാണിത്. ബോക്‌സിങ് ഫെഡറേഷന്‍ ഓഫ് ഇന്ത്യ തന്നെയാണ് ടീമിന്റെ ഫ്രാഞ്ചൈസി. ഫെബ്രുവരി ആദ്യ ആഴ്ച റഷ്യയുമായി ഉദ്ഘാടന മത്സരത്തിനിറങ്ങുന്ന ഇന്ത്യയുടെ ആദ്യ ഹോം പോരാട്ടം മാര്‍ച്ച് 24ന് കസാഖിസ്ഥാന്‍ ഫ്രാഞ്ചൈസിയുമായാണ്. പിന്നീട് ഏപ്രില്‍ 20ന് റഷ്യയുമായും 21ന് ചൈനയുമായും ഇന്ത്യ ഹോം പോരാട്ടത്തില്‍ മത്സരിക്കും. കസാഖിസ്ഥാന്‍, ചൈന ടീമുകളുമായുള്ള ഇന്ത്യയുടെ എവേ മത്സരം ഫെബ്രുവരി പത്തിനും മാര്‍ച്ച് ഒന്‍പതിനുമാണ് നടക്കുക. പത്ത് വിഭാഗങ്ങളിലായാണ് ബോക്‌സിങ് പരമ്പര അരങ്ങേറുന്നത്. ഗ്രൂപ്പ് ഏഷ്യന്‍ വിഭാഗത്തിലാണ് ഇന്ത്യ, ചൈന, കസാഖിസ്ഥാന്‍, റഷ്യ ടീമുകള്‍ മത്സരിക്കുന്നത്. യൂറോപ്പ്, അമേരിക്ക എന്നിവയാണ് മറ്റ് ഗ്രൂപ്പുകള്‍.