കൊച്ചി: നിക്ഷിപ്ത വനഭൂമിയായി പ്രഖ്യാപിച്ചതുമായി ബന്ധപ്പെട്ട് 37 വര്‍ഷം പഴക്കമുള്ള കേസ് ഹൈക്കോടതി തീര്‍പ്പാക്കി.
തിരുവിതാംകൂര്‍ രാജ കുടുംബത്തില്‍നിന്ന് നെയ്തല്ലൂര്‍ കോയിക്കല്‍ കുടുംബത്തിന് ലഭിച്ച ആലപ്ര, വലിയകാവ്, കരിക്കാട്ടൂര്‍ എന്നിവിടങ്ങളിലെ ഭൂമി നിക്ഷിപ്ത വനമാക്കാന്‍ സര്‍ക്കാരിന് വിജ്ഞാപനമിറക്കാനാകില്ലെന്ന് ഹൈക്കോടതി വിധിച്ചു.
ഭൂമിയുടെ കൈവശാവകാശം സംബന്ധിച്ചകാര്യം പരിഗണിച്ചിട്ടില്ലെന്നും വിധിയിലുണ്ട്. തിരുവിതാംകൂര്‍ വന നിയമവും 1961 ലെ കേരള വന നിയമവും കണക്കിലെടുത്താണ് വിജ്ഞാപനം നിലനില്‍ക്കുമോയെന്ന് പരിശോധിച്ചത്. ഇതിനുശേഷമുള്ള 1971ലെ സ്വകാര്യ വനം നിക്ഷിപ്തമാക്കല്‍ നിയമം, 2003 ലെ കേരള വന (പരിസ്ഥിതി ലോല പ്രദേശം നിക്ഷിപ്തമാക്കല്‍) നിയമം എന്നിവയനുസരിച്ചുള്ള നടപടി ഭൂമിയില്‍ സാധ്യമാണോയെന്ന് പരിഗണിച്ചിട്ടില്ല.
ഇക്കാര്യം ട്രൈബ്യൂണലാണ് പരിഗണിക്കേണ്ടതെന്നും വിധിയില്‍ പറയുന്നു.
രാജകുടുംബത്തില്‍നിന്ന് ലഭിച്ച ഭൂമിയില്‍ തങ്ങള്‍ക്ക് അവകാശമുണ്ടെന്നും സര്‍ക്കാരിന് തിരുവിതാംകൂര്‍ വനനിയമപ്രകാരം നിക്ഷിപ്ത വനമായി പ്രഖ്യാപിക്കാന്‍ കഴിയില്ലെന്നുമായിരുന്നു കുടുംബാംഗങ്ങളുടെ പരാതി. ഇതു പരിഗണിച്ച എറണാകുളം ജില്ലാ കോടതി നിക്ഷിപ്ത വനമായി വിജ്ഞാപനം ചെയ്യാന്‍ സര്‍ക്കാരിന് കഴിയില്ലെന്ന് വിധിച്ചിരുന്നു.
രാജകുടുംബത്തില്‍നിന്ന് ലഭിച്ച ഭൂമിയില്‍ തങ്ങള്‍ക്ക് അവകാശമുണ്ടെന്ന് ഭൂവുടമകള്‍ വാദിച്ചെങ്കിലും ഇതിനുള്ള രേഖകള്‍ക്ക് ആധികാരികതയില്ലെന്ന നിലപാടാണ് സര്‍ക്കാര്‍ സ്വീകരിച്ചത്. നൂറുവര്‍ഷം മുന്‍പുള്ള രേഖകളുടെ ആധികാരികത ഉറപ്പുവരുത്തുന്നത് അസാധ്യമായതിനാല്‍ സാഹചര്യത്തെളിവുകള്‍കൂടി പരിഗണിക്കണമെന്ന് വ്യക്തമാക്കിയാണ് ഹൈക്കോടതി ജില്ലാ കോടതിയുടെ ഉത്തരവ് ശരിവച്ചത്.