മലപ്പുറം: ആറര കിലോ കഞ്ചാവുമായി രണ്ടുപേര്‍ മലപ്പുറം പൊലിസിന്റെ പിടിയില്‍. നിലമ്പൂര്‍ ചന്തക്കുന്ന് ചാരക്കുളം സൈഫുദ്ദീന്‍(29), മലപ്പുറം കോഡൂര്‍ ഉറുദുനഗര്‍ പിച്ചന്‍ മുത്തങ്ങാത്തൊടി മുഹമ്മദ് ഹാറൂണ്‍(22) എന്നിവരാണ് പിടിയിലായത്. സിഐ എ.പ്രേംജിത്തിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയില്‍ കോണോംപാറ ചുങ്കത്ത് വച്ചാണ് പ്രതികളെ അറസ്റ്റ് ചെയ്തത്.
കഞ്ചാവ് കടത്താനുപയോഗിച്ച പള്‍സര്‍ ബൈക്കും കസ്റ്റഡിയിലെടുത്തു. തമിഴ്‌നാട്ടിലെ ഉദുമല്‍പേട്ടയില്‍ നിന്നാണ് കഞ്ചാവ് കൊണ്ടുവരുന്നതെന്ന് പ്രതികള്‍ സമ്മതിച്ചിട്ടുണ്ട്. വേങ്ങരയിലെ രഹസ്യകേന്ദ്രത്തില്‍ സൂക്ഷിച്ചതിന് ശേഷം വിദ്യാര്‍ഥികള്‍ക്കും അന്യസംസ്ഥാന തൊഴിലാളികള്‍ക്കും വില്‍പ്പന നടത്തുകയായിരുന്നു പതിവ്. പ്രതികളിലൊരാളായ സൈഫുദ്ദീനെതിരേ നിലമ്പൂര്‍, എടക്കര സ്‌റ്റേഷനുകളില്‍ വധശ്രമം ഉള്‍പ്പടെ നിരവധി കേസുകളുണ്ടെന്ന് പൊലിസ് പറഞ്ഞു.