കോഴിക്കോട്: പുതിയ സര്‍ക്കാര്‍ അധികാരത്തില്‍ വന്ന സാഹചര്യത്തില്‍ സംസ്ഥാനത്ത് വ്യക്തമായ ജലനയം വേണമെന്ന ആവശ്യം ശക്തമാകുന്നു. കേരളം കണ്ട ഏറ്റവും വലിയ വരള്‍ച്ചയും ഉഷ്ണവുമാണ് ഇത്തവണയുണ്ടായത്. ഈ സാഹചര്യത്തിലാണ് സംസ്ഥാനത്ത് ജലനയം പ്രഖ്യാപിച്ചുകൊണ്ട് സര്‍ക്കാര്‍ നിലപാട് വ്യക്തമാക്കണമെന്ന്  ജലശാസ്ത്രജ്ഞന്‍മാര്‍ ആവശ്യപ്പെടുന്നത്.  ഈ വേനലില്‍ പാലക്കാട്, കോഴിക്കോട്, കണ്ണൂര്‍ ജില്ലകളാണ് ഏറ്റവും കൂടുതല്‍ ചൂട് അനുഭവപ്പെട്ടത്. പാലക്കാട് ജില്ലയില്‍ 41 ഡിഗ്രി വരെ ചൂട് കൂടിയപ്പോള്‍ കോഴിക്കോട്ടും കണ്ണൂരും 39 വരെ താപനില ഉയര്‍ന്നിരുന്നു.
നേരത്തെ വരള്‍ച്ച നേരിടാന്‍ എല്ലാ വീടുകള്‍ക്കും ജലസംഭരണികള്‍ വേണമെന്നും അത്തരം വീടുകള്‍ക്ക് മാത്രമേ പ്ലാന്‍ അനുവദിക്കുകയുള്ളൂ എന്നും സര്‍ക്കാര്‍ നിലപാട് കടുപ്പിച്ചിരുന്നു. പിന്നീട് ഇത് പ്രാവര്‍ത്തികമാക്കുന്നതില്‍ വീഴ്ചയുണ്ടായതോടെ മഴവെള്ള സംഭരണിയെന്നത് പ്രഖ്യാപനത്തില്‍ ഒതുങ്ങി.

കേരളത്തില്‍ ഒരു വര്‍ഷം 3000 മില്ലിമീറ്റര്‍ മഴ ലഭിക്കുന്നുണ്ടെന്നാണ് കണക്കാക്കിയിട്ടുള്ളത്. ലോക ശരാശരിയേക്കാള്‍ മൂന്നിരട്ടിയാണ് കേരളത്തില്‍ ലഭിക്കുന്നതെന്നാണ് യാഥാര്‍ഥ്യം. എന്നാല്‍ ഇത്തവണ ചൂട് കൂടിയതും വരള്‍ച്ച കഠിനമായതും കുടിവെള്ളക്ഷാമത്തിന് കാരണമായിട്ടുണ്ട്. സംസ്ഥാനത്തിന്റെ പലഭാഗങ്ങളിലും കുടിവെള്ള ലഭ്യത കുറവായതുകാരണം തദ്ദേശ സ്വയംഭരണ സ്ഥാപനങ്ങളും ജില്ലാ ഭരണകൂടങ്ങളും ഇടപെട്ട് വെള്ളം എത്തിച്ചുനല്‍കുകയാണ്.
മഴവെള്ളത്തിന്റേയും മറ്റ് ജലസ്രോതസുകളുടേയും ദുരുപയോഗമാണ് ഇപ്പോള്‍ നേരിടുന്ന കടുത്തകുടിവെള്ള പ്രതിസന്ധിക്ക് കാരണമെന്ന് സി.ഡബ്ല്യു.ആര്‍.ഡി.എമ്മിലെ ശാസ്ത്രജ്ഞര്‍ പറയുന്നു. മഴക്കാലത്ത് വെള്ളം കുത്തിയൊലിച്ചുപോകാതിരിക്കാനുള്ള സംവിധാനങ്ങള്‍ വേണ്ടരീതിയില്‍ ഇല്ലാത്തതുകാരണം ഓരോ മഴയിലും ലഭിക്കുന്ന വെള്ളം ഉപരിതലത്തിലൂടെ ഒലിച്ചിറങ്ങിപോകുകയാണ്.
2003-04 വര്‍ഷത്തില്‍ തുലാവര്‍ഷം ചതിച്ചതുമൂലമുണ്ടായ വരള്‍ച്ചയ്ക്ക് സമാനമായ വരള്‍ച്ചയാണ് ഇത്തവണ അനുഭവപ്പെട്ടത്. പുതിയ സര്‍ക്കാറിന്റെ നേതൃത്വത്തില്‍ വേനല്‍ തടയുന്നതിനുള്ള ദീര്‍ഘകാല പദ്ധതികള്‍ ആവിഷ്‌കരിച്ചിട്ടില്ലെങ്കില്‍ പ്രശ്‌നം കൂടുതല്‍ വഷളാകുമെന്നും പരിസ്ഥിതി പ്രവര്‍ത്തകര്‍ മുന്നറിയിപ്പു നല്‍കുന്നു. ഇക്കാര്യം ചൂണ്ടിക്കാട്ടി പരിസ്ഥിതി സംഘടനകളുടെ നേതൃത്വത്തില്‍ ജലസേചന മന്ത്രി ഉള്‍പ്പടെയുള്ളവര്‍ക്ക് നിവേദനം നല്‍കാനും തീരുമാനിച്ചിട്ടുണ്ട്.