കമ്പളക്കാട്: മതസഹിഷ്ണുതയും സൗഹാര്‍ദവും കാത്തുസൂക്ഷിക്കുകയും തീവ്രവാദത്തിനും ഭീകരതക്കും വേരോട്ടം നല്‍കാതെയും ചിട്ടയായ മതപ്രവര്‍ത്തനങ്ങളും പ്രബോധന പ്രചാരണങ്ങളും മൂലം ലോകം തന്നെ കേരളത്തെ മാതൃകയാക്കിയതില്‍ ജാമിഅ നൂരിയ്യ പോലുള്ള സ്ഥാപനങ്ങള്‍ വഹിച്ച പങ്ക് വളരെ വലുതാണെന്ന് ഡബ്ല്യു.എം.ഒ പ്രസിഡന്റും മുസ്‌ലിംലീഗ് ജില്ലാ ജനറല്‍ സെക്രട്ടറിയുമായ കെ.കെ അഹമ്മദ് ഹാജി പറഞ്ഞു.
ജാമിഅ സമ്മേളന പ്രചരണാര്‍ഥം ജില്ലാ സ്റ്റുഡന്റ്‌സ് ഫോറം മൂന്നു ദിവസങ്ങളിലായി സംഘടിപ്പിക്കുന്ന മെസേജ് വാഗണ്‍ 2018ന്റെ ഉദ്ഘാടനം കമ്പളക്കാട് നിര്‍വഹിച്ച് സംസാരിക്കുകയായിരുന്നു അദ്ദേഹം. ടൗണ്‍ ഖത്തീബ് ശരീഫ് ഹുസൈന്‍ ഹുദവി അധ്യക്ഷനായി. ഹാരിസ് ബാഖവി കമ്പളക്കാട് മുഖ്യ പ്രഭാഷണം നടത്തി. തോപ്പില്‍ അഷ്‌റഫ്, എം. ഹനീഫ്, എം.വി സിറാജുദ്ദീന്‍, ടി റഫീഖ്, പി. മമ്മു, കെ കുട്ട്യാലി സംബന്ധിച്ചു. സിറാജുദ്ദീന്‍ ഫൈസി സ്വാഗതവും ജുനൈദ് മുസ്‌ലിയാര്‍ നന്ദിയും പറഞ്ഞു.
സി.പി അഷ്‌റഫ് മുസ്‌ലിയാര്‍ ക്യാപ്റ്റനും ഷാനവാസ് മുസ്‌ലിയാര്‍ വൈസ് ക്യാപ്റ്റനുമായ സന്ദേശ ജാഥ വിവിധയിടങ്ങളില്‍ പര്യടനം നടത്തി വൈകിട്ട് വെള്ളമുണ്ട എട്ടേനാലില്‍ സമാപിച്ചു. സമാപനോദ്ഘാടനം അലി യമാനി നിര്‍വഹിച്ചു. നൂറുദ്ദീന്‍ ഫൈസി പ്രഭാഷണം നടത്തി. ജാഥ ഇന്ന് രാവിലെ ഒന്‍പതിന് വാരാമ്പറ്റ മഖാം സിയാറത്തോടെ ആരംഭിച്ച് വിവിധ സ്ഥലങ്ങളില്‍ പര്യടനം നടത്തി വൈകിട്ട് സുല്‍ത്താന്‍ ബത്തേരിയില്‍ സമാപിക്കും.