തളിപ്പറമ്പ്: ഐ.ആര്‍.പി.സിയുടെ നേതൃത്വത്തില്‍ ബക്കളം നെല്ലിയോട്ട് ശബരിമല ഇടത്താവളത്തിന്റെ പ്രവര്‍ത്തനം 15ന് സമാപിക്കും. ഉച്ചയ്ക്ക് 12ന് മന്ത്രി കെ.കെ ശൈലജ സമാപന സമ്മേളനം ഉദ്ഘാടനം ചെയ്യും. കഴിഞ്ഞ നവംബര്‍ 20നാണ് ഐ.ആര്‍.പി.സി ജില്ലാ കമ്മിറ്റിയും അയ്യപ്പസേവാ സംഘവും സംയുക്തമായി ശബരിമല തീര്‍ഥാടകര്‍ക്കായി നെല്ലിയോട്ട് ഭഗവതി ക്ഷേത്രപരിസരത്ത് ഇടത്താവളം തുറന്നത്. ഇവിടെയെത്തുന്ന ഭക്തര്‍ക്ക് പ്രാഥമിക സൗകര്യങ്ങള്‍ നടത്താനും വിശ്രമിക്കാനും മൂന്നുനേരം ഭക്ഷണത്തിനും സജ്ജീകരണങ്ങളൊരുക്കിയിരുന്നു. ഇതുവരെയായി അരലക്ഷത്തിലധികം ഭക്തര്‍ ആന്ധ്ര, കര്‍ണാടക, തമിഴ്‌നാട് സംസ്ഥാനങ്ങളില്‍ നിന്നായി ഇവിടെ എത്തിയതായും സംഘാടക സമിതി ഭാരവാഹികള്‍ പറഞ്ഞു. വാര്‍ത്താസമ്മേളനത്തില്‍ സി. അശോക് കുമാര്‍, എ. കൃഷ്ണന്‍, കെ.സി മണികണ്ഠന്‍ നായര്‍, ടി.വി വിനോദ്, പി.വി സതീഷ് കുമാര്‍ പങ്കെടുത്തു.