ചൊക്ലി: ചൊക്ലി പൊലിസ് സ്റ്റേഷന്‍ പരിധിയില്‍ വീണ്ടും ലഹരിമരുന്ന് വേട്ട. മാരാങ്കണ്ടി സബ് സ്റ്റേഷന്‍ റോഡില്‍ നിന്നും തലശേരി സ്വദേശിയെ ബ്രൗണ്‍ ഷുഗറുമായി പൊലിസ് അറസ്റ്റ് ചെയ്തു. ഇന്നലെ വൈകുന്നേരം നാലരയോടെയാണ് ഓട്ടോറിക്ഷയില്‍ ഒളിപ്പിച്ച് കടത്തുകയായിരുന്ന 25,000 രൂപയുടെ ബ്രൗണ്‍ ഷുഗറുമായി തലശ്ശേരി പൊന്ന്യം പാലം എം.കെ ഹൗസില്‍ താമസിക്കുന്ന മാഹി മഞ്ചക്കല്‍ ആയിശുമ്മ ക്വാര്‍ട്ടേഴ്‌സില്‍ അഷ്‌റഫാ(36)ണ് പിടിയിലായത്. ചൊക്ലി പ്രിന്‍സിപ്പല്‍ എസ്.ഐ ഇ.വി ഫായിസ് അലി, അഡീഷനല്‍ എസ്.ഐ അജയന്‍, സി.പി.ഒമാരായ രാജേഷ്, ഷാജു ഒഞ്ചിയം, റജി, പ്രകാശ് എന്നിവര്‍ അടങ്ങുന്ന സംഘമാണ് പ്രതിയെ പിടികൂടിയത്. കഴിഞ്ഞദിവസം ഹെറോയിനുമായി മൂന്നുപേരെ പെരിങ്ങത്തൂര്‍ പാലത്തിനടുത്തു നിന്നും ചൊക്ലി പൊലിസ് അറസ്റ്റ് ചെയ്തിരുന്നു. പ്രതിയെ ഇന്ന് കോടതിയില്‍ ഹാജരാക്കും.