മട്ടന്നൂര്‍: എടയന്നൂര്‍ ഗവ. ഹയര്‍സെക്കന്‍ഡറി സ്‌കൂളില്‍ എസ്.എഫ്.ഐക്കാര്‍ കെ.എസ്.യു കൊടി നശിപ്പിച്ചതുമായി ബന്ധപ്പെട്ടുണ്ടായ സംഘര്‍ഷം അക്രമത്തില്‍ കലാശിച്ചു. ഇന്നലെ വൈകുന്നേരം മൂന്നോടെ കെ.എസ്.യുവിന്റെ കൊടിമരം നശിപ്പിച്ചത് ചോദ്യം ചെയ്തതിനെ തുടര്‍ന്ന് എസ്.എഫ്.ഐ പ്രവര്‍ത്തകരുമായി വാക്തര്‍ക്കം നടന്നിരുന്നു. തുടര്‍ന്ന് കോണ്‍ഗ്രസ് ഓഫിസിലുണ്ടായിരുന്ന കെ.എസ്.യു പ്രവര്‍ത്തകരെ ഒരു സംഘം സി.ഐ.ടി.യു-ഡി.വൈ.എഫ്.ഐ പ്രവര്‍ത്തകര്‍ ആക്രമിക്കുകയും കോണ്‍ഗ്രസ് മന്ദിരം തകര്‍ക്കുകയുമായിരുന്നു. അക്രമത്തില്‍ പ്രതിഷേധിച്ച് കോണ്‍ഗ്രസും സി.പി.എമ്മും എടയന്നൂരില്‍ ഇന്ന് പകല്‍ ഹര്‍ത്താലിന് ആഹ്വാനം ചെയ്തു
അക്രമികള്‍ ഓഫിസിലെ ഫര്‍ണിച്ചറുകളുള്‍പ്പെടെ മുഴുവന്‍ സാധനങ്ങളും തകര്‍ത്തു. കെ.എസ്.യു പ്രവര്‍ത്തകരായ എന്‍. ജുറൈജ്(17), എച്ച്.എം ഹബീബ് (17), പി.പി നജാത്(17), കെ.കെ ആദര്‍ശ്(17), എന്‍.കെ സജീഷ്(16), സി. റയ്യാന്‍(17) എന്നിവരെ തലശേരി ഇന്ദിരാഗാന്ധി ആശുപത്രിയില്‍ പ്രവേശിപ്പിച്ചു. ആക്രമി സംഘത്തെ എടയന്നൂരില്‍ കോണ്‍ഗ്രസ് പ്രവര്‍ത്തകര്‍ തടയുകയും സംഘര്‍ഷമുണ്ടാവുകയും ചെയ്തു.
അക്രമത്തില്‍ ഇവര്‍ സഞ്ചരിച്ച ജീപ്പ് തകര്‍ത്തു. എസ്.എഫ്.ഐ പ്രവര്‍ത്തകരായ റഷീദ്(16), വിഷ്ണു(16) എന്നിവര്‍ക്കും പരുക്കേറ്റു. ഇവരെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു.