പെരിന്തല്‍മണ്ണ: കഴിഞ്ഞ ദിവസം പെരിന്തല്‍മണ്ണ ഗവ. ബോയ്‌സ് ഹൈസ്‌കൂള്‍ വിദ്യാര്‍ഥികള്‍ പെരിന്തല്‍മണ്ണ പൊലിസ് സ്റ്റേഷനില്‍ ഏല്‍പ്പിച്ച വഴിയില്‍ നിന്നു കളഞ്ഞു കിട്ടിയ സ്വര്‍ണാഭരണം ഉടമക്ക് കൈമാറി. പെരിന്തല്‍മണ്ണ പട്ടാമ്പി റോഡിലെ ആര്യവൈദ്യശാലയുടെ മുന്‍വശത്തുനിന്നു കഴിഞ്ഞ ബുധനാഴ്ച വൈകീട്ടാണ് വിദ്യാര്‍ഥികളായ ആദില്‍ അലി, അജ്മല്‍, മുഹമ്മദ് ദസ്തികിന് എന്നിവര്‍ക്ക് സ്വര്‍ണാഭരണം കളഞ്ഞുകിട്ടിയത്.
ഇവര്‍ ആഭരണം എസ്.ഐക്ക് കൈമാറുകയായിരുന്നു. പത്രവാര്‍ത്തയെ തുടര്‍ന്ന് അന്വേഷിച്ചെത്തിയ ഉടമയായ ചെറുകര പാറക്കല്‍മുക്ക് കുന്നത്ത് വീട്ടില്‍ നജ്മുദ്ദീന്റെ ഭാര്യ ഹസീനക്ക് ഇന്നലെ ആഭരണം തിരികെ നല്‍കി.