തൊടുപുഴ: ജനതാദള്‍ ദേശീയ സെക്രട്ടറി ജനറല്‍ ഡോ. വര്‍ഗീസ് ജോര്‍ജ്ജിന്റെ നേതൃത്വത്തിലുള്ള യു.ഡി.എഫ് മേഖലാ ജാഥ 14, 15 തിയതികളില്‍ ഇടുക്കി ജില്ലയില്‍ പര്യടനം നടത്തും. ജില്ലയിലെ അഞ്ച് നിയോജകമണ്ഡലങ്ങളിലെ ഓരോ കേന്ദ്രങ്ങളില്‍ അതാത് നിയോജക മണ്ഡലം ഏകോപന സമിതികളുടെ നേതൃത്വ ത്തില്‍ ജാഥക്ക് സ്വീകരണം നല്‍കും.
14-ന് രാവിലെ 11 മണിക്ക് തൊടുപുഴ നിയോജകമണ്ഡലത്തിലെ കരിമണ്ണൂരില്‍ മുന്‍ മുഖ്യമന്ത്രി ഉമ്മന്‍ ചാണ്ടി ജാഥ ഉദ്ഘാടനം ചെയ്യും. വൈകിട്ട് 4ന് ഇടുക്കി നിയോജകമണ്ഡലത്തിലെ തങ്കമണി, 15-ന് രാവിലെ 10ന് മൂന്നാര്‍, ഉച്ചകഴിഞ്ഞ് 3-ന് ഉടുമ്പന്‍ചോല നിയോജകമണ്ഡലത്തിലെ പൂപ്പാറ, വൈകിട്ട് 5-ന് പീരുമേട് നിയോജകമണ്ഡലത്തിലെ വണ്ടിപ്പെരിയാര്‍ എന്നീ കേന്ദ്രങ്ങളില്‍ ജാഥക്ക് സ്വീകരണം നല്‍കും.
ജാഥയുടെ മുന്നൊരുക്കങ്ങള്‍ക്കായി ജില്ലയിലെ അഞ്ച് സ്വീകരണ കേന്ദ്രങ്ങളിലും അതാത് നിയോജക മണ്ഡലം ഏകോപന സമിതിയുടെ നേതൃത്വത്തില്‍ വിപുലമായ സ്വാഗതസംഘം വിളിച്ചു കുട്ടും.
എഴിന് രാവിലെ 11ന് മൂന്നാര്‍, ഉച്ചകഴിഞ്ഞ് 2-ന് തങ്കമണി, വൈകിട്ട് 5-ന് കരിമണ്ണൂര്‍, 8-ന് രാവിലെ 11-ന് പൂപ്പാറ, ഉച്ചകഴിഞ്ഞ് 2-ന് വണ്ടിപ്പെരിയാര്‍ എന്നീ കേന്ദ്രങ്ങളിലാണ് സ്വാഗതസംഘം യോഗങ്ങള്‍ ചേരുന്നത്.
തൊടുപുഴ രാജീവ് ഭവനില്‍ ചേര്‍ന്ന യു.ഡി.എഫ് ജില്ലാ നേതൃയോഗത്തില്‍ ജില്ലാ ചെയര്‍മാന്‍ അഡ്വ. എസ് അശോകന്‍ അധ്യക്ഷത വഹിച്ചു. ജില്ലാ കണ്‍വീനര്‍ റ്റി.എം സലീം സ്വാഗതം പറഞ്ഞു. ഡോ. വര്‍ഗീസ് ജോര്‍ജ്ജ് യോഗം ഉദ്ഘാടനം ചെയ്തു.
ജാഥയുടെ വൈസ് കാപ്റ്റന്‍ ജോസഫ് വാഴക്കന്‍ മുഖ്യപ്രഭാഷണം നടത്തി. ജാഥയുടെ കോര്‍ഡിനേറ്ററും കെ.പി.സി.സി സെക്രട്ടറിയുമായ വി.എ സലീം പ്രവര്‍ത്തനരേഖ അവതരിപ്പിച്ചു. പി.പി. സുലൈമാന്‍ റാവുത്തര്‍ എക്‌സ് എം എല്‍ എ, ഡി.സി.സി പ്രസിഡന്റ് ഇബ്രാഹിം കുട്ടി കല്ലാര്‍, മുന്‍ ഡി.സി.സി പ്രസിഡന്റു മാരായ എം.റ്റി തോമസ്, റോയി.കെ.പൗലോസ്, യുത്ത് കോണ്‍ഗ്രസ് സംസ്ഥാന പ്രസിഡന്റ് അഡ്വ. ഡീന്‍ കുര്യാക്കോസ്, കെ.പി.സി.സി നിര്‍വാഹക സമിതി അംഗങ്ങളായ സി.പി മാത്യു, എം. ഷാഹുല്‍ ഹമീദ്, മുസ്‌ലിം ലീഗ് ജില്ലാ പ്രസിഡന്റ് കെ.എം.എ ഷുക്കൂര്‍, കേരള കോണ്‍ഗ്രസ് ജില്ലാ പ്രസിഡന്റ് മാര്‍ട്ടിന്‍ മാണി, സി.എം.പി ജില്ലാ സെക്രട്ടറി സുരേഷ് ബാബു, ജനതാദള്‍ ജില്ലാ പ്രസിഡന്റ് അനൂപ് ഫ്രാന്‍സിസ്, ആര്‍.എസ്.പി നേതാവ് ജി. ബേബി പ്രസംഗിച്ചു.