റിയാദ്: യു.എസ് സൈന്യത്തില്‍നിന്ന് ബ്ലാക്‌ഹോക് ഹെലികോപ്ടറുകള്‍ സഊദിക്ക് നല്‍കാന്‍ കരാര്‍. 200 മില്യണ്‍ ഡോളര്‍ കരാറിനാണ് 17 ബ്ലാക്‌ഹോക് ഹെലികോപ്ടറുകള്‍ യു.എസ് സൈന്യം സഊദിക്ക് നല്‍കുന്നത്. ഇതിനായി യു.എസ് സൈന്യം ലോക് ദീന്‍ മാര്‍ട്ടിന്‍ കമ്പനിയായ സീക്കോറെക്‌സിയുമായി കരാറിലേര്‍പ്പെട്ടു.
സഊദിക്ക് ലഭിക്കുന്ന ബ്ലാക്‌ഹോക് ഹെലികോപ്ടറുകളില്‍ യു.എച്ച്-60 എം ഇനത്തില്‍പെട്ട എട്ടെണ്ണം സഊദി നാഷനല്‍ ഗാര്‍ഡിനും ബാക്കിയുള്ളവ സഊദി എയര്‍ഫോഴ്‌സ് സ്‌പെഷല്‍ വിങ്ങിനുമായിരിക്കും ലഭിക്കുക. 2022ലായിരിക്കും കരാര്‍ പൂര്‍ത്തീകരിക്കുക. സൈനികരംഗത്തും യുദ്ധരംഗത്തും ഏറെ പ്രാധാന്യമുള്ള ഗണത്തിലാണ് ബ്ലാക്‌ഹോക് യു.എച്ച്-60 എം ഇനത്തില്‍പെട്ട വിമാനങ്ങള്‍ കണക്കാക്കപ്പെടുന്നത്.
കരയിലും ആകാശത്തും പ്രതിസന്ധികള്‍ അനായാസം കൈകാര്യം ചെയ്യാന്‍ കഴിയുന്ന ഈ കോപ്ടറായിരുന്നു ബിന്‍ലാദനെ വകവരുത്തിയ 2011ലെ അബട്ടാബാദ് സൈനിക ഓപറേഷനിലെ പ്രധാന സൈനിക വാഹനം.