ചങ്ങരംകുളം: ബ്ലോക്ക് പഞ്ചായത്ത് തൊഴിലുറപ്പ് പദ്ധതിയുടെ കീഴില്‍ ആലങ്കോട് പഞ്ചായത്തിലെ കാളച്ചാല്‍ കാട്ടിപ്പാടത്ത് അക്കേഷ്യ ഉള്‍പ്പടെയുള്ള വൃക്ഷങ്ങള്‍ നട്ട് പാടം നികത്താന്‍ ശ്രമം നടക്കുന്നതായി പരാതി.
ഏക്കറുകള്‍ നീണ്ടു കിടക്കുന്ന പാടത്തിന്റെ നടുവില്‍ സ്ഥല ഉടമ വന്‍ തോതിലായി അക്കേഷ്യ, പറങ്കിമാവ്, തെങ്ങ് തുടങ്ങിയ മരങ്ങളാണ് നട്ടിട്ടുളളത്. പാടത്ത് കുളം നിര്‍മാണവും തകൃതിയായി നടക്കുകയാണ്. കുളംകുഴിക്കുമ്പോള്‍ ലഭിക്കുന്ന മണ്ണ് ഉപയോഗിച്ച് വ്യാപകമായി പാടം നികത്താനുളള ശ്രമമാണ് ഇതിന് പിന്നിലുളളത്. ബ്ലോക്ക് ഡവലപ്‌മെന്റ് ഓഫിസറോ മറ്റു ഉദ്യോഗസ്ഥരോ സ്ഥലം സന്ദര്‍ശിക്കാതെയാണ് കുളം നിര്‍മാണത്തിന് അനുമതി നല്‍കിയത്. ഇതില്‍ പ്രതിഷേധിച്ച് പ്രദേശവാസികള്‍ ആലംകോട് ഗ്രാമപഞ്ചായത്തില്‍ പരാതി നല്‍കിയിട്ടുണ്ട്. എന്നാല്‍ ഇതിന് നടപടി എടുക്കേണ്ട ഉത്തരവാദിത്വം ബ്ലോക്ക് പഞ്ചായത്ത് അധികൃതര്‍ക്കാണെന്നാണ് പഞ്ചായത്ത് പറയുന്നത് . പാടത്തിന്റെ നടുവില്‍ വൃക്ഷത്തൈകള്‍ നട്ട് കൃഷിയിടം നികത്താനുളള ശ്രമമാണ് ഇതിനു പിന്നിലെന്നും ബ്ലോക്ക് ഡവലപ്‌മെന്റ് ഓഫീസര്‍ ഉള്‍പ്പെടെയുളളവര്‍ ഒത്താശ ചെയ്തു കൊടുക്കുയാണെന്നും കര്‍ഷകര്‍ പറയുന്നു.
ഇപ്പാള്‍ കുളത്തിന്റെ മറവിലുളള കോലോത്തു പാടം കോള്‍പടവിന് സമീപത്തു കിടക്കുന്ന ഈ കൃഷിയിടങ്ങള്‍ സംരക്ഷിക്കണമെന്നും വൃക്ഷത്തൈകള്‍ നീക്കം ചെയ്യണമെന്നും കര്‍ഷകര്‍ ആവശ്യപ്പെട്ടു.
അല്ലാത്തപക്ഷം പ്രവൃത്തി തടയുകയും ബി ഡി.ഓഫിസിലേക്ക് മാര്‍ച്ച് നടത്തുകയും ചെയ്യുമെന്ന് കര്‍ഷകര്‍ പറഞ്ഞു. ഈ സ്ഥലത്ത് തെങ്ങിന്‍തൈ നട്ട് കഴിഞ്ഞ വര്‍ഷം പാടം നികത്താന്‍ ശ്രമം നടത്തുകയും നടുകാര്‍ തടയുകയും ചെയ്തിരുന്നു.