മലപ്പുറം: ജാമിഅ നൂരിയ്യ സനദ്ദാന സമ്മേളനത്തോടനുബന്ധിച്ച് നടന്നുവരുന്ന മജ്‌ലിസുന്നൂര്‍ വാര്‍ഷിക സംഗമം 18ന് പട്ടിക്കാട് ഫൈസാബാദില്‍ നടക്കും.
വൈകിട്ട് ഏഴിന് പാണക്കാട് സയ്യിദ് ഹൈദരലി ശിഹാബ് തങ്ങളുടെ നേതൃത്വത്തിലാണ് മജ്‌ലിസുന്നൂര്‍ നടക്കുന്നത്. സംസ്ഥാന അമീര്‍ സയ്യിദ് മുഹമ്മദ് കോയ ജമലുല്ലൈലി തങ്ങള്‍ ആമുഖ പ്രസംഗം നടത്തും.
സമസ്ത കേരള ജംഇയ്യത്തുല്‍ ഉമലാ ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, പാണക്കാട് സയ്യിദ് സാദിഖലി ശിഹാബ് തങ്ങള്‍, കോഴിക്കോട് ഖാസി സയ്യിദ് നാസര്‍ അബ്ദുഹയ്യ് ശിഹാബ് തങ്ങള്‍, വാവാട് കുഞ്ഞിക്കോയ മുസ്‌ലിയാര്‍, മൂസക്കുട്ടി ഹസ്രത്ത്, അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍, ഏലംകുളം ബാപ്പു മുസ്‌ലിയാര്‍, സയ്യിദ് മുഹമ്മദ് കോയ തങ്ങള്‍ ബാഅലവി, സയ്യിദ് ഉണ്ണിക്കോയ തങ്ങള്‍ പാണ്ടിക്കാട്, സയ്യിദ് ഇമ്പിച്ചിക്കോയ തങ്ങള്‍ ഒറ്റപ്പാലം തുടങ്ങിയവര്‍ സംബന്ധിക്കും.
ഹസന്‍ സഖാഫി പൂക്കോട്ടൂര്‍ ഉദ്‌ബോധനം നടത്തും. പാണക്കാട് സയ്യിദ് ഹൈദരലി ശിഹാബ് തങ്ങളുടെ നിര്‍ദേശപ്രകാരം നടക്കുന്ന മജ്‌ലിസുന്നൂറില്‍ അമീറുമാരും സ്ഥിരാംഗങ്ങളും ഉള്‍പ്പെടെ പതിനായിരങ്ങളെത്തും.
ജനബാഹുല്യംകാരണം ഏതാനും വര്‍ഷമായി ജാമിഅ സമാപന സമ്മേളന മൈതാനത്താണ് മജ്‌ലിസുന്നൂര്‍ നടന്നുവരുന്നത്. രാജ്യത്തും ജി.സി.സി, മലേഷ്യ തുടങ്ങിയ രാജ്യങ്ങളിലുമായി നിലവില്‍ അയ്യായിരത്തിലേറെ മജ്‌ലിസുന്നൂര്‍ സദസ്സുകള്‍ നടന്നുവരുന്നുണ്ട്.