തളിപ്പറമ്പ്: മുയ്യത്ത് റോഡരികിലെ വാഴത്തോട്ടത്തില്‍ സാമൂഹ്യദ്രോഹികള്‍ കക്കൂസ് മാലിന്യം തള്ളി. മുയ്യം പാലത്തിനു സമീപത്തെ വയലില്‍ മുയ്യം സ്വദേശികളായ അബുവിന്റെയും മുഹമ്മദ് കുഞ്ഞിയുടെയും വാഴത്തോട്ടത്തിലാണ് മാലിന്യം തള്ളിയത്. ഇന്നലെ രാവിലെയാണ് സംഭവം നാട്ടുകാരുടെ ശ്രദ്ധയില്‍പ്പെട്ടത്. മണം ഒഴിവാക്കാന്‍ കരിഓയിലും ഡീസലും കൂട്ടികലര്‍ത്തിയാണ് മാലിന്യം തള്ളിയത്.
ഈ ഭാഗത്ത് മാര്‍ക്കറ്റിലെ ചീഞ്ഞ പച്ചക്കറി, അറവു മാലിന്യങ്ങള്‍ തള്ളുന്നത് പതിവായതി നാല്‍ നാട്ടുകാര്‍ മുന്നറിയിപ്പ് ബോര്‍ഡ് വയ്ക്കുകയും രാത്രിയില്‍ നിരീക്ഷണം ഏര്‍പ്പെടുത്തുകയും ചെയ്തിരുന്നു. കുറച്ചു ദിവസങ്ങളായി രാത്രി നിരീക്ഷണം ഒഴിവാക്കിയതോടെ വീണ്ടും മാലിന്യ നിക്ഷേപം ആരംഭിച്ചിട്ടുണ്ടെന്ന് നാട്ടുകാര്‍ പറഞ്ഞു. ഇവിടെ സ്ഥാപിച്ച ബോര്‍ഡും നശിപ്പിച്ചിട്ടുണ്ട്. കുറുമാത്തൂര്‍ പഞ്ചായത്ത് പ്രസിഡന്റ് ഐ.വി നാരായണന്‍, കെ ജാനകി, ഹെല്‍ത്ത് ഇന്‍സ്‌പെക്ടര്‍ സജി ജോസഫ് എന്നിവര്‍ സ്ഥലം സന്ദര്‍ശിച്ചു. തളിപ്പറമ്പ് പൊലിസില്‍ പരാതി നല്‍കി.