രാജപുരം: സ്വകാര്യ ബസില്‍ കണ്ടക്ടറുടെ ശല്യം അസഹ്യമായതിനെ തുടര്‍ന്നു പാതിവഴിയില്‍ ഇറങ്ങിയ വിദ്യാര്‍ഥിനിക്ക് പരുക്കേറ്റു. രാജപുരം സെന്റ് പയസ് ടെന്‍ത് കോളജിലെ ഒന്നാം വര്‍ഷ ബിരുദ വിദാര്‍ഥിനി കൊടവലത്തെ വി ശ്രീനയാണ് ബസില്‍ നിന്നും വീണ് പരുക്കേറ്റ് പൂടംകല്ല് സി.എച്ച്.സിയില്‍ ചികത്സയില്‍ കഴിയുന്നത്. കഴിഞ്ഞ ദിവസം രാവിലെ കാഞ്ഞങ്ങാട് പാണത്തൂര്‍ റൂട്ടിലോടുന്ന സ്വകാര്യ ബസിലെ ജീവനക്കാരന്റെ ഉപദ്രവം സഹിക്കാന്‍ പറ്റാത്തതിനെ തുടര്‍ന്ന് ഒരു കൂട്ടം വിദ്യാര്‍ഥിനികള്‍ പാറപ്പള്ളി സ്‌റ്റോപ്പില്‍ ഇറങ്ങിയിരുന്നു. ഇവര്‍ പൂര്‍ണമായും ഇറങ്ങുന്നതിനു മുന്‍പ് ബസ് മുന്നോട്ടെടുത്തതാണ് അപകട കാരണമെന്നു ഒപ്പമുണ്ടായിരുന്ന വിദ്യാര്‍ഥിനികള്‍ പറഞ്ഞു. വിവരമറിഞ്ഞു അമ്പലത്തറ പൊലിസ് ബസ് കണ്ടക്ടര്‍ പാണത്തൂരിലെ പ്രവീണ്‍ (32)നെതിരേ കേസെടുത്തു.